- Alborecemos ente’l borrín y la nublina con dalguna precipitación na fastera centru-oriental d’Asturies ya con unes temperatures que tan alrodiu de los 12ºC, rexistrándose nel puirtu Payares 5,4ºC.
- Güei vamos tener nubosidá baxa que va dir dixebrándose pa dexanos el cielu con nubes ya claros o abancios nes hores centrales del día con unes temperatures qu’anicien un descensu ya col aire nordés que pue soplar cafiante nel llitoral y zones espuestes.
- Mañana martes tendremos una mañana seliquina ente nubes ya claros o abancios pa dir aumentando la nubosidá dende l’oriente, surdiendo les precipitaciones al atapecer con unes temperatures en bultable descensu ya con la cota de nieve perriba de los 1300m, amás l’aire nordés seguirá soplando cafiante na costa y zones altes.
- Durante’l riscar del miércoles ye cuando tendremos les precipitaciones más abondoses, asína como nevaes moderaes perriba de los 1300m na cordelera, pa dir remitiendo al alborecer, quedando xarabatos febles ya dispersos durante la mañana y desapareciendo pela tarde con unes temperatures en descensu ya col aire que seguirá siendo del nordés con raches moderaes nel llitoral y cordelera.
- El xueves tará nuboso pero sin precipitaciones y subirán dalgo les temperatues másimes mentantu baxen les mínimes pudiendo xelar nes zones más favoretibles.
