- Fonte: actualidá Asturies /
- Los trabayos van mostrase tamién na sede del Institutu Cervantes de la metrópolis china hasta’l 16 de febreru
- Esta iniciativa enmárcase ente les acciones qu’impulsa Cultura pa fomentar la internacionalización del arte de la comunidá
El Gobiernu d’Asturies espón esta selmana na feria d’arte West Bund de Shanghái la muestra ¿De dónde sale ese espacio en mí? De olas, nubes y coraje, qu’incluye obres de seis creadores asturianos.
El director xeneral d’Acción Cultural y Normalización Llingüística, Antón García, inauguró güei esti montaxe acompañáu por Inma González Puy, directora na metrópolis china del Institutu Cervantes, organismu que collaboró estrechamente col Principáu nesti proyectu. Tamién asistieron los comisarios Laila Bermúdez y Ramón Isidoro.
La iniciativa enmárcase dientro de la estratexa pa internacionalizar l’arte asturianu que promueve la Conseyería de Cultura, Política Llingüística y Deporte. La esposición estrémase en dos espacios: una sala principal nel Institutu Cervantes de Shanghái y una estensión na feria d’arte y diseñu West Bund.
La muestra recueye los trabayos de seis creadores asturianos: Soledad Córdoba, Kela Coto, José Ferrero, Ramón Isidoro, Marcos Morilla y Javier Riera, que conviven nel espaciu con cuatro artistes chinos: Guo Tianyi, Lin Fanglu, Yin Liang y Yu Mengtong. D’esta manera, establezse un diálogu intercultural sobre l’espaciu natural, cultural y social del entornu qu’habitamos.
¿De dónde sale ese espacio en mí? trabaya con paisaxes al traviés de disciplines como la fotografía, la videoinstalación, la pintura y la escultura. Nel percorríu, percíbese la diferente visión del territoriu que representen creadores asturianos y chinos, que, sicasí, coinciden a la de combinar tradición y modernidá o naturaleza y industrialización.
La esposición nel Institutu Cervantes de Shanghái va inaugurase mañana y va tar abierta hasta’l 16 de febreru. Na feria va poder visitase dende güei y hasta’l domingu que vien.
