«Temperatures altes a la espera del descensu de mañana»
- Alborecemos con nubes ya claros o abancios, tando más escampláu na metá norte d’Asturies con unes temperatures que tan alrodiu de los 10ºC, rexistrándose nel puirtu Payares 4,2ºC.
- Güei vamos seguir col cielu empuercáu de nubes medies y altes que sedrán más abondoses na cordelera y fastera más surocidental d’Asturies onde nun se descarta dalguna precipitación feble, nel restu sedrá mui poco probable, sicasí al finar el día aumentarán les posibilidaes. Les temperatures van caltenese suaves y l’aire ábrigu pue soplar con fuercia en zones altes de montaña ya en puntos del llitoral.
- Mañana xueves la llegada d’una vaguada atlántica va apurrinos un frente que mos barrerá a primera hora de la mañana con precipitaciones abondoses que vendrán acompangadas d’un descensu moderáu de les temperatures con el role de vientu a componente norte que pue soplar con raches fuertes en zones altes ya en puntos de la costa. La cota de nieve dirá baxando de les cumes más altes hasta situase pela tarde perriba de los 1200m. cuando los xarabatos sedrán menos frecuentes ya intensos.
- El vienres tovía vamos tener dalgo de nubosidá, sobre too pela mañana, tando más escampláu a patir de mediudía con unes temperatures que van camudar poco, sicasí descenderán dalgo les mínimes y subirán llixeramente les másimes. L’aire va quedar sele ya variable.
- El sábadu vamos tener un día soleyeru y perguapu con dalguna xelada nes zones más favoretibles al alborecer, el domingu aumentará la nubosidá pola entrada de vientu de noroeste anticiclónicu que pue dexanos dalguna precipitación al finar el día, el llunes podría llover dalgo y nevar en zones altes de la cordelera y paez que lu que resta d’añu va instalase l’anticiclón enrriba nuesu pa dexanos un tiempu mui estable con escasa nubosidá, temperatures fresques pela nueche y suaves a primera hora de la tarde.
