Los alquileres nun dexen de xubir, un aumentu disparáu del númberu de pisos turísticos (siendo Uviéu y Xixón dos de les ciudaes qu’esperimentaron mayores crecederes de too el país) y una demanda incesante por mercar casa n’Asturies son los trazos qu’empiecen a definir un panorama esmolecedor sobro l’accesu a la vivienda nuna comunidá que nun tien un aumentu singular de población y qu’amás ta bien avieyada y que nun tien enormes cifres de crecedera económica, ¿qué asocede?
L’INE: Institutu Nacional d’Estadística reveló que la compraventa de vivienda n’Asturies disparose n’ochobre un 69,8% respectu al mesmu mes del añu pasáu (12,5 puntos más qu’en septiembre y siendo la tercera mayor xubida ente les comunidaes autónomes), ye qu’amás l’añu pasáu foi la única comunidá autónoma na que xubió la compraventa de vivienda, un 5,6 per cientu, y sumó asina tercer exerciciu col númberu d’operaciones a l’alza. Trés años consecutivos d’aumentu d’operaciones de vivienda n’Asturies que nun se dieron n’otros territorios.
Nel detalle de les tables del INE, mirando les categoríes de les operaciones d’Asturies reparase a lo llargo del añu una notable medría en toes elles, crecen los heriedos, crecen les donaciones, hasta crecen (un pocu) les permutes, pero se trata de crecíes menores, lo qu’aumenta de forma considerable, la crecedera relevante ye la compraventa, ye un puntu caliente del mercáu inmobiliariu y dende va tiempu.
