Héctor Braga llanza single nuevu y sigue presentando’l so ensayu sobre l’asturianada
- Fonte: MúsicAsturias /
El multiinstrumentista y Doctor en Musicoloxía Héctor Braga remata l’añu cola mesma intensidá que lu caltuvo a lo llargo’l 2024. Tres de llanzar los videoclips de «Llobatu» y «Valiente», estrena güei l’últimu cenciellu del so próximu discu Rabil, que va asoleyase na primavera.
El single entitúlase «Roubiltones» y, en pallabres del músicu, «ye una banda sonora bien asturiana y bien prestosa pa estes navidaes, pa tar cola familia cantando y dir de fiesta dempués al son del rabil». Amás, güei a les 19h va presentar el so ensayu Nel cantu la memoria nel Ateneo Obrero de Villaviciosa y tien otres tres presentaciones pal añu qu’entra.
«El títulu fai un xuegu de pallabres ente “Roubil” y “Saltones”. Ye un tema d’esi estilu folkie que tanto presta n’Asturies, y tien un aquel navidiegu porque entama con un villancicu tradicional pixuetu que siempre me prestó cantar nestes feches col mio rabil. Nelli apaez un tal “Piricu” que tamién toca’l “Roubil” (la gaita rabil) y
remata con un par de saltones instrumentales; ún de composición propia y otru iguáu dende’l repertoriu pa xipla de Francisco de la Vilieḷḷa (Cangas).», comenta Héctor Braga sobre esti cantar.
Pa grabar «Roubiltones» -que sal tamién en formatu lyric video– el músicu llangreanu cuntó cola cola andecha de Pepín de Muñalén (xiblata), Moi Suárez (guitarra), Carlos Laiz (baxu), Simón San José (percusión) y Javier Blanco (Teclaos y programaciones). Anque’l cantar ve la lluz agora nes plataformes musicales, yá vien sonando nos sos conciertos: «mos da muncha bona vibra nos directos y a la xente-y presta enforma baillar con esi enclín discotequeru que-y dimos», conclúi Héctor Braga.
Presentaciones del ensayu
Amás d’esti llanzamientu, esta mesma tarde esti Doctor en Musicoloxía y Historia del Arte va presentar nel en Villaviciosa l’ensayu col qu’algamó’l XXIX Premiu Máximo Fuertes Acevedo d’Ensayu que concede’l gobiernu asturianu. Nel cantu la memoria. Ensayu sobre l’asturianada tradicional ye un trabayu perinteresante que percuerre, a lo llargo de 334 páxines, esti xéneru musical dende 1795 hasta 1966. A les 19h l’Ateneo Obrero acueye la presentación a la que van siguir otres tres en xineru: el día 3 na casa la cultura de Sotu’l Barcu, el 10 na llibrería Matadero Uno d’Uviéu y el 17 na casa la cultura de Les Arriondes.
