«Templa’l tiempu»
- Alborecemos col cielu empuercáu de nubes medies y altes ya con unes temperatures que tan alrodiu de los 5ºC, anque pela costa por mor del vientu tan perriba de los 10ºC, rexistrándose nel puirtu Payares -0,1ºC.
- Güei vamos tener nubosidá media-alta que dirá n’aumentu pa dexanos el día nuble, amás l’aire ábrigu, anque sele, fadrá subir les temperatures másimes pa templar abondu l’ambiente.
- Mañana vienres sedrá un día pasáu per agua con precipitaciones xeneralizaes que sedrán más abondoses na fastera surocidental d’Asturies con unes temperatures mínimes n’ascensu bultable ya col aire gallegu que dirá coyendo puxu.
- El sábadu yá nun tendremos precipitaciones pero seguirán les nubes y l’ambiente sedrá suave. El domingu entamará a soplar l’aire ábrigu con fuercia faciendo que suban les temperatures y mos dexen un ambiente primaveral, dempués del fríu d’estos díes. Nel cielu tendremos nubosidá media-alta y al finar el día ye probable que surdan precipitaciones, sobre too na fastera más surocidental d’Asturies.
- El día de reis va rolar el vientu a componente noroeste empobinándonos xarabatos, un descensu de les temperatures y faciendo que surda la nieve perriba de los 900m, pero esto yá lu diremos viendo.
