La pareya de bisontes europeos en Teberga espera una cría, un finxu p’Asturies

La pareya de bisontes europeos en Teberga espera una cría, un finxu p’Asturies. El bisonte européu  nun termina d’asitiase n’Asturies: les dificultaes pa reintroducir la especie nel Principáu. Nel Parque de la Prehistoria de Teberga tán de norabona y anguaño confíen en que creza la familia: la pareya de bisontes europeos qu’ellí vive espera una cría. Pero va ser una nacencia simbólica, pos, cuando naza’l que vien en camín, los teberganos van ser los trés únicos animales d’una especie que s’aguanta a instalase n’Asturies, non asina n’España.

El bisonte européu nun acaba d’atopar acomodu n’Asturies, magar que en España la so población, anque de forma lenta, cada vez va a más. Son unos 11.000 los exemplares qu’hai nel mundu, 160 en toa España, y de estos, dos (machu y fema) nel Principáu, concretamente nel Parque de la Prehistoria de Teberga.

Esta pareya de bisontes llegó fai unos cuantos años a la cortil y ta en camín d’ampliar familia. «Creemos que la fema ta preñada y esperamos una nacencia en 2025», adelantra’l veterinariu avilesín Fernando Morán, fundador y responsable del Centru de Caltenimientu del Bisonte européu n’España.

Sicasí, la d’Asturies ye una presencia simbólica , enfocada al turismu y empobinada a dar a conocer una especie qu’habitó na Península Ibérica fai miles d’años y a principios del sieglu XX tuvo en peligru d’estinción. Y tampoco ta fácil que vaiga a más por dellos motivos, ente ellos, les duldes científiques de que sía aconseyable fomentar la so cría. Ello ye que apocayá más d’un mes conoció un informe de cuarenta investigadores de distintos países, especialistes n’Ecoloxía Histórica, Paleontoloxía, Arqueoloxía, Derechu, Xenética, Ecoloxía, Bioloxía del Caltenimientu y Cambéu climáticu, que desaconseya la introducción del bisonte européu n’España porque dulden de la so utilidá.

Tolo contrario opina Fernando Morán, quien destaca los beneficios que traería p’Asturies la espansión del animal. «A priori ye un llugar escelente pa esta especie, sobremanera en zones onde la ganadería estensiva abandónase, yá que tamos sufriendo un aumentu de les quemes por cuenta de esi abandonu rural desastrosu pal nuesu paisaxe. Tamién sería útil pa menguar la depredación del llobu sobro’l ganáu y polo xeneral pa restaurar procesos ecolóxicos y aumentar la biodiversidá», abonda. Sicasí almite que’l camín pa ver bisontes nos montes asturianos «ye llargu».

Pel momento, los intentos qu’hubo de cría na rexón nun salieron adelantre. Son dos los proyectos, recuerda Morán, qu’hubo hasta agora: unu, nuna finca privada de la Braña del Zapurrel (Villayón) que duró un añu, ente 2012 y 2013; y otru, un pequenu centru de cría nuna finca al llau del Ikea en Llugones (Siero), que duró dende 2012 a 2017. Na actualidá nun hai nengunu de cría.

Nun ye fácil llevar a cabu un proyectu pa la cría de bisonte européu. «Primero habría que tener una base llegal pa restituyilos y esta, nestos momentos nun esiste. Tán buscándose evidencies de la presencia d’esta especie de Bisonte n’Iberia. Pero entá si atopáramos al bisonte actual européu, o bison bonasus, nun xacimientu, quedaría evaluar la idoneidá d’esa especie pa la situación de la naturaleza n’Asturies y eso sueli ser un procesu llargu», esplica’l profesional avilesín, qu’asesora dellos proyectos n’España y pasa por ser unu de los principales espertos sobro la especie.

Na so opinión, lo básico ye faer un proyectu piloto pa ver les bondaes de la presencia del animal nel territoriu: «Una de les coses bones que tien ye que puede revertise cualquier acción y tantu pol so tamañu como pola so bioloxía enxamás puede ser una especie invasora».

Les dos amenaces d’estinción nel sieglu XX. Fernando Morán suma más de 15 años de trabayu y esfuerzu por protexer y recuperar el bisonte européu na Península Ibérica. El so oxetivu ye protexer la especie de la estinción «cenciellamente teniendo más animales en más territoriu, que ye lo que precisa, y en condiciones naturales, como fauna selvaxe y non como si fuera un zoolóxicu». Sostien qu’espandila per Europa previen de problemes sanitarios venceyaos al cambéu climáticu o andaes por enfermedaes epizooties.