Activaos los avisos mariellos por mínimes que pueden baxar de los -4ºC o -6ºC en 19 provincies. Noticia
Fonte: LNE /
La fola xeliza va quedase na rexón siquier hasta’l domingu,
cola llegada d’agües y nieve a partir de los 1.400 metros.
N’Asturies fae estos díes un fríu que pela. Tinéu amaneció güei con casi 4 graos baxo cero (-3,8) y ayeri la mínima raspió los 5 en negativu nel mesmu conceyu (-4,8).
La fola xeliza va quedase na rexón hasta a lo menos el domingu. Pa esi día, l’Aemet preve la entrada d’una umbada, que va camudar el sol peles nubes y va dexar precipitaciones d’oeste a este mientres la mañana. Tamién va haber nieve. La cota va asitiase nos 1.400 metros d’altitú.
Amás de Tinéu, güei empezaron el día con termómetros baxo cero: L.lena y Pola de Somiedu (-2,4), Piloña (-2,1) y Mieres (-1,5). A los diez de la mañana, por casu, Mieres inda siguía en negativu. Pela so parte, Xixón baxó mientres les primeres hores a los 0,6 graos baxo cero, ente que les temperatures n’Uviéu bazcuyaron ente los 3,1 y los 0,7 graos. Les máximes pa güei, sicasí, van siguir baxes, como n’anteriores xornaes. Espérense, como muncho, 14 graos de máxima al sol en Xixón.
