La lluvia tiende a retirase
con apertura de claros nel cielu
con apertura de claros nel cielu
- Alborecemos col cielu mui nuboso y precipitaciones con unes temperatures que tan alrodiu de los 9ºC, rexistrándose nel puirtu Payares 2,3ºC.
- Güei van dir remitiendo les precipitaciones del alborecer y amás nel cielu van dir abriéndose dellos claros o abancios con unes temperatures en descensu ya cola cota de nieve que ronda a estes hores los 1600m pa dir baxando hasta los 1300m pero yá sin malpenes precipitaciones. L’aire gallegu pue sopla con raches fuertes en zones altes ya en puntos del llitoral.
- Mañana domingu torna l’aire ábrigu cola consiguiente subida de les temperatures, dempués d’una nueche fría por mor del cielu poco nuboso, amás lo fae con puxu y mos va dexar raches mui fuertes en zones altes ya en puntos del llitoral . Al atapecer la llegada d’un frente atlánticu va dir repartiendo precipitaciones per Asturies d’oeste a este, mentantu pel día solo s’esperen na fastera más surocidental y cordelera con unes temperatures n’ascensu.
- El llunes lo más destacáu sedrá’l vientu que vendrá con raches mui fuertes de componente oeste y mos dexará mui mala mar amás d’un descensu nes temperatures faciendo que baxe la cota de nieve al finar el día perriba de los 900m, sobre too na cordelera más ocidental que ye onde s’esperen les precipitaciones más abondoses, nel restu sedrán febles, intermitentes ya ocasionales.
- El martes paez que pue ser un día mui fríu con dalgún xarabatu dispersu que sedrá de nieve perriba de los 600-700m con mayor probabilidá na fastera surocidental d’Asturies por mor del vientu que seguirá siendo gallegu y soplando con fuercia.
- Y si nun camudan los pronósticos la llegada d’una borrasca al Cantábricu a partir del miércoles pela tarde podría dexanos precipitaciones abondoses per toa Asturies y sobre too nevaes copioses na cordelera perriba de los 1000m faciendo que puean reabrir de nuevu les estaciones d’esquí asturianes, pero esto yá lu diremos viendo.
