Un símbolu más del zodiacu-calendariu llunar de lois árboles:
L’umeru: 18 de marzu al 14 d’abril
- Ogham: Fearn /Piedra: rubí / Flor: xiniesta / Animal: ferre palomberu
- La pallabra umeru podría derivar d‘aminarius d’orixe inciertu, o de ulmanarius del llatín ulmus y esti del Protoindoeuropeu helem anque nun hai certeceza.
Ye un árbol rellacionáu cola bidul y l’ablanu qu’espoxiga cerque de les corrientes d’agua y nun xorrez en zones ensuches. La madera aguanta bien embaxo l’agua, poro, emplegábase abondo anguaño pa facer pontes, bombes, o pa vares que se diben a usar cuando construyíen cases cerque de llagos o ríos.
Nel cuartu mes llunar, los celtes emplegábenlo pa facer carbón vexetal pa les ferreríes nes que se forxaben y afilaben armes nueves, polo que l’umeru rellacionábase cola guerra y la caza.
La corteza de l’umeru emplegábase pa tratar reúma y tamién inflamaciones. Les cataplasmes de fueyes d’umeru yeren bones pa quemadures y problemes del pelleyu.
Yera un árbol sagráu pa los druides que facíen flautes cola médula del árbol esti y los guaños xorrecen n’espiral y, teníen el sen de resurreición.
Fearn: Ye un símbolu d’evolución de l’espíritu. Na mitoloxía celta l’umeru representaba la tiesta del dios Bran, nel sen d’oráculu. Fearn deriva de l’antiguu irlandes y esti del antiguu xermánicu *elawer, col sen de collorau, porque cuando se corta, la madera interior camuda a esi collor que s’atopa, na sangre, representa’l fueu y’l sol.
Rubí: Símbolu de vitalidá y fuercia. Pol so collor taba asociau a les enerxíes del coral, rellacionao cola compasión, la devoción y l’amor.
Xiniesta: Toda esta planta tien un valor medicinal. Los guaños muestren un valor diuréticu suave, la esparteína contenida na xiniesta emplégase pa problemes del coral y circulatorios. l’aceite de los tallos ayuda colos dolores de mueles y llimpia’l pelleyu de parásitos. la esparteína en grandes dosis produz alucinaciones y escitabilidá, quiciaves por eso rellacionábase coles bruxes en dómines anteriores.
Los druides recoyíen los primeros gauños y flores y metíenlos nun vinu dulce fecho de la cazumbre de la bidul col envís de camudar l’estáu de la conciencia nel equinocciu de primavera, Alban Eilir.
La Bretaña francesa usó la xiniesta como símbolu heráldicu dende bien ceo y d’ende vien la familia de los Plantagenet, de planta genista.
Ferre Palomberu: Ye un animall asociáu a Bran, el dios de l’Otru Mundu. Yera’l páxaru del presaxu y de los espíritus condenáos. Solía referise a l’ésitu algamáu en pocu tiempu.
Personalidá de los umeros: Los umeros son xente que afronta les dificultaes con ciñu. Tienen sede d’aventures que, delles vegades pué parecer lloca pero qaue-yos sirve pa frañer les torgues que otros imponen.
La personalidá de l’umeru ta enllena d’enerxía y son grandes emprendeores avezaos al riesgu tanto nuna dómina física como empresarial o sicolóxica. La llibertá ye pernecesaria pa esta xente , pero tamién lo ye l’amor. Faen perbonos pás y más, anque non necesariamente, bones pareyes.
