- Educación entama trés charres virtuales con seis muyeres destacaes nel campu de la ciencia, la tecnoloxía y les matemátiques. Van empezar a los dolce del mediudía y van ser d’accesu llibre, al traviés d’un enllaz disponible nel portal Educastur.
- 👉Les ponencies van dirixíes a estudiantes de 5º y 6º de Primaria y de los cuatro cursos d’ESO.
- 👉L’eventu pretende sirvir d’inspiración al alumnáu y fomentar la igualdá de xéneru nestes disciplines.
La conseyería unvió tamién un boletín a los centros nel qu’informa d’esta actividá ya inclúi un enllaz a la sesión inaugural.
La primera va ser el vienres 14 de febreru cola participación de Noelia Rico, llicenciada n’Informática pola Universidá d’Uviéu; y Rosa María Sainz, doctora en Bioloxía pola mesma universidá y profesora de Bioloxía Molecular. Tamién dirixe’l grupu d’investigación Bioloxía Redox y Metabolismu en Cáncer.
El miércoles 26 de febreru van intervenir Noemí Pinilla, doctora en Física del Cosmos pola Universidá de La Llaguna y l’Institutu d’Astrofísica de Canaries; y Cristina Fernández, técnica en soldadura. El ciclu cerrará’l miércoles 12 de marzu con Lucía González, llicenciada en Física pola Universidá d’Uviéu, máster n’Astrofísica pola Universidá de La Llaguna y doctora n’Astrofísica pol Institutu d’Astrofísica de Canaries, y Laura Muñiz, llicenciada en Matemátiques cola especialidá d’Estadística pola Universidá d’Uviéu.
