- Descarga (PDF): https://acortar.link/0PYVDw
- Fonte:Fundación Belenos/ Musicasturiana.com /
Otru añu más -y yá van 25- l’Anuariu de la Música Asturiana vuelve a asoleyar en formatu físicu y dixital. Esta publicación ye tou un referente de la escena sonora del país, prueba de la so vitalidá, dinamismu y diversidá.
Ye portavoz de los sos llogros y carencies, de la so problemática y situación. Al cumplise’l XXV Aniversariu Goxe Producciones quixo «conmemoralu con un volume especial, con mayor paxinación, conteníos y calidá, lo que supón un esfuerciu económicu bultable». Amás sorrayen que «la distribución gratuita ye’l oxetivu» y pa ello óptase «por una financiación basada na publicidá, polo que son los propios anunciantes quien faen posible la pervivencia y ameyoramientu d’un proyectu como esti».
L’Anuariu de la Música Asturiana 2024 fai un repasu fondu a lo que dio de sí’l pasáu añu. Como de costume, les temátiques céntrense n’estilos como la música tradicional, el folk, el rock o la canción d’autor, con secciones qu’inclúin reportaxes, informes, entrevistes, crítiques, opinión, recoyida de material o anuncies. L’Entamu, nesta ocasión, titúlase «La fortaleza de la música asturiana» y nél faise una retrospectiva de lo que foron pa la música asturiana estes dos últimes décades.
L’Anuariu zárrase, como siempre, cola sección «Collecha», onde apaecen les producciones musicales y bibliográfiques del 2024. El volume compleméntase con un discu nel que se recueyen muestres de lo meyor qu’ufiertó l’añu, con diecinueve cortes repartíos n’estilos como’l folk, el rock, el reggae o la electrónica, con artistes y grupos como Rubén Alba, Guieldu, Beleño, Herbamora, Llevólu’l Sumiciu, Fruela 757, Melandru o La Tarrancha.
