- Alborecemos col cielu nuboso na fastera ocidental y cordelera, tando más escampláu nel centru-oriente d’Asturies con unes temperatures que tan alrodiu de los 10ºC, rexistrándose nel puirtu Payares 3,4ºC onde sopla l’aire ábrigu con fuercia.
- Güei vamos tener intervalos de nubes medies y altes que sedrán más abondoses na cordelera y fastera surocidental d’Asturies onde puen tener precipitaciones ocasionales, nel restu sedrán mui poco probables con unes temperatures condicionaes pol vientu ábrigu que pue soplar cafiante en zones altes de montaña.
- Mañana vienres l’aire ábrigu va dir coyendo puxu con raches mui fuertes na cordelera, amás fadrá que baxe la humedá y suban les temperatures apurriéndonos tamién nubosidá media-alta entemcía ente dellos claros o abancios.
- El sábadu la borrasca atlántica va situase mui cerca de Galicia afeutandonos más con más precipitaciones, sobre too na fastera surocidental y cordelera onde sedrán moderaes y persistentes, siendo menos probables cuantu más al nororiente nos atopemos. Les temperatures descenderán ya inclusu surdirá la nieve perriba de los 1600-1800m con vientu ábrigu que va soplar con raches mui fuertes en zones altes y en puntos del llitoral.
- El domingu si que paez que les nevaes na cara sur de la cordelera sedrán más abondoses por mor de tener la borrasca mui cerca de nosotros faciendo que baxen los xeopotenciales y con ello la isoterma «0» , surdiendo la nieve perriba de los 1200m. Nel restu d’Asturies, abellugaos pela cordelera, tendremos un tiempu más seliquino con nubes ya claros, temperatures suaves y vientu sele de componente sur.
Esti ye’l mapa de previsión del modelu GFS pal riscar del domingu, onde vese la borrasca atlántica sobre Galicia empobinándonos vientu ábrigu pero con xeopotencias mui baxos faciendo que nieve pela cordelera, mentantu nel restu tendremos un tiempu muncho más sele con nubes ya claros o abancios y temperatures suaves.
