El Principáu entama na plaza del Fontán d’Uviéu un aula al campu d’educación n’igualdá. L’actividá Esperimenta la coeducación va desenvolvese n’horariu de mañana y forma parte de la programación pel Día Internacional de les Muyeres 8M qu’anguaño pon l’acentu na educación n’igualdá como ferramienta clave para prevenir la violencia sexista y combatir la desigualdá dende la escuela.La directora xeneral d’Igualdá, María Jesús Álvarez, va participar nesti espaciu interactivu con actividaes coeducatives coles mires de dar a conocer exemplos concretos de cómo s’aplica la coeducación nes aules.
Mientres la mañana, una profesora bien particular va percorrer la plaza uvieina animando a la ciudadanía a sumase a distintes dinámiques que ponen el focu na educación n’igualdá. Nun espaciu diseñáu para la ocasión, les persones asistentes van poder vivir esperiencies coeducatives de forma lúdica y didáctica. En casu d’agua, l’actividá va treslladar a la Biblioteca Pública Ramón Pérez d’Ayala.
Ente les propuestes destaquen la posibilidá de somorguiase nos cuadros de dos grandes maestres del arte, Maruxa Mallo y Carolina del Castillo. Coles mesmes, podrán resolvese cosadielles con una perspectiva d’educación n’igualdá o rindir homenaxe a muyeres que fueron referentes nel nuesu día ente día. Estes actividaes van tar dinamizaes pola empresa cultural Cúntame un cuadru, que va averar la coeducación d’una manera interactiva y creativa.
