LLABoral Centru d’Arte y Creación Industrial publica la convocatoria pa cubrir el puestu de dirección. L’organismu busca escoyer, al traviés d’un xuráu especializáu, un perfil innovador pa liderar la so programación artística y la xestión organizativa. El procesu busca garantizar la idoneidá de la persona escoyida, baxo los principios d’igualdá, méritu y capacidá.
Llaboral Centru d’Arte y Creación Industrial publicó güei la convocatoria pa cubrir el puestu de dirección. Les persones interesaes pueden presentar la candidatura hasta’l 5 de mayu. El procesu busca garantizar la idoneidá de la persona escoyida, baxo los principios d’igualdá, méritu y capacidá. La comisión científica va tener un pesu decisivu nel procesu de selección, que se divide en trés fases.
La convocatoria ta abierta a profesionales con esperiencia en xestión cultural y dirección artística, con conocencia sobre les práctiques artístiques contemporánees, captación de recursos económicos y desenvolvimientu de proyectos en redes locales, nacionales y internacionales.
L’anunciu publicóse esta mesma selmana, como adelantara la presidenta del patronatu de la fundación y conseyera de Cultura, Política Llingüística y Deporte, Vanessa Gutiérrez, na Xunta Xeneral. El Principáu reafirma asina’l so compromisu cola tresparencia y la escelencia na xestión cultural, amás d’apostar por un lideratu que refuercie’l papel del centru nel panorama artísticu nacional y internacional.
El puestu, que se va cubrir pente medies d’un contratu llaboral d’alta dirección pa un periodu de cinco años prorrogables, supón la responsabilidá máxima na xestión y programación de la institución. Les funciones incluyen la dirección artística y la xestión económica y organizativa, en coordinación col patronatu y la comisión executiva.
Les persones candidates han cuntar con una titulación universitaria vinculada a la xestión cultural o les práctiques artístiques contemporanees, amás d’una esperiencia acreitable de lo menos cinco años. Amás, establezse como condición la conocencia del contestu artísticu d’Asturies, amás d’un nivel altu de castellanu y inglés.
El procesu selectivu consta de trés fases: valoración de méritos, presentación d’un proyectu de dirección y una entrevista. Toles etapes van tar tutelaes por un xuráu altamente cualificáu, compuestu por dos miembros del patronatu de la fundación, trés integrantes de la comisión científica, una persona esterna con esperiencia en dirección artística nuna institución cultural allegada a Llaboral y un secretariu con voz, pero ensin votu.
Los nomes de les persones integrantes del xuráu van dase a conocer enantes d’empezar el procesu selectivu. Esta estructura garantiza una evaluación rigorosa y oxetiva de les candidatures, al empar que va asegurar que la persona escoyida cumpla colos estándares más altos de competencia y visión estratéxica pa dirixir l’organismu.
Importancia de la comisión científica
La comisión científica del centru desempeñó un papel fundamental na ellaboración de les bases y criterios de selección de la convocatoria, cola mira d’asegurar que’l perfil solicitáu respuenda a les necesidaes y oxetivos estratéxicos del centru. Esti órganu viose fortalecíu apocayá cola incorporación de figures destacaes nos campos de la cultura y la sostenibilidá, como Brenda Chávez y Belén Álvarez Cabrera, y de profesionales prestixosos de la xestión cultural como Blanca de la Torre y Bartomeu Marí.
La diversidá de perfiles na comisión científica muestra’l compromisu de Llaboral cola innovación, el pensamientu críticu y la intersección ente arte, ciencia y tecnoloxía, asegurando una visión multidisciplinar nel desenvolvimientu del centru.
La información detallada sobre’l procesu de selección, requisitos y bases completes de la convocatoria tán disponibles na páxina web de Llaboral Centru d’Arte (www.laboralcentrodearte.org), nesti enllaz: https://laboralcentrodearte.org/ye/convocatories/convocatoria-plaza-direccion/
Llaboral Centru d’Arte y Creación Industrial, inauguráu nel 2007 en Xixón, ye un espaciu de referencia pa la creación que suma arte, ciencia y tecnoloxía. La so programación multidisciplinar abarca esposiciones, talleres, programes educativos y actividaes que fomenten la conocencia y l’accesu a ferramientes innovadores pa la comunidá artística y el públicu xeneral.
