Juncal Alonso, de la cuenca minera al imperiu de Twitch: una asturiana ente les profesionales nueves con más potencial del país. «Asturies ye nuesa Ítaca particular, entamamos el viaxe siempres teniéndola como destín final, dacuando ensin danos cuenta de que teamos onde teamos yá nos lo dio tou, vien con nós y ye parte de lo que somos».
- Fonte: LNE /
«Nací n’Ayer. Lidero en Madrid la estratexa creativa del Brand Partnerships Studio de Twitch, el mayor serviciu de streaming del mundu y parte del ecosistema Amazon n’España. Amás, fui escoyida por Nova como una de los 111 profesionales menores de 35 años con más potencial del país. El mio trabayu siempres consistió en cuntar hestories: de persones, marques y organizaciones, buscando crear conexones al traviés de la creatividá»
Ye una de los 111 profesionales menores de 35 años con más potencial del país. Casi nada. Juncal Alonso (Ayer, 1991) lidera en Madrid la estratexa creativa del Brand Partnerships Studio de Twitch, el mayor serviciu de streaming del mundu.
Rebobinemos: «Por caprichu del mio padre, nací en ‘Ayer’. Asina lo inscribió nel rexistru, a pesar de que llegué al mundu nel hospital n’Uviéu. Los ayeranos tamién nacemos onde queremos. Esti fechu reflexa’l so enfotu –creo qu’esitosu– en crear nel mio hermanu y en mi un enraigono y un arguyu de ‘pueblu’. Los mios padres, que siempres nos dieron llibertá para salir y esquizar, supieron semar en nós esi xerme d’asturianía que nos devuelve a casa con solo escuchar una palabra nesi acentu cantariegu tan nuesu. Potenciaron en nós grandes nales con raigaños fuertes, un gran sentíu de la llealtá y la xusticia tan amestaos a esta tierra, y un tesón que raspia la cabezonería, propiu de los de ‘la viga travesá’».
Los sos primeros años trescurrieron en Moreda d’Ayer, arrodiada de muyeres: «Toya, Mati, Lluz… y la mio güela Zuce, omnipresente como cuidadora y referente, entós y agora. Cuando los mios padres trabayaben, siempres había dalguna –munches vegaes toes– en casa, dándo-y sentíu a la palabra sororidad muncho primero de que se punxera de moda. Depués camudamos a La Pola L.lena, onde pasé la mayor parte de la mio niñez y mocedá, ganándome les credenciales de ‘asturiana de la cuenca minera’ que llevo con arguyu».
Foi al colexu Sagrada Familia-El Pilar, onde empezó a forxase «la mio vocación. Yera una ‘mala’ estudiante de bones notes. Tuvi grandes profesores que s’ocuparon de potenciar otres habilidaes qu’anguaño son clave nel mio oficiu. El club de llectura y les redacciones qu’escribía cada domingu para Yayo desenvolvieron el mio amor poles lletres; los concursos de dibuxu y toles ‘fueyes’ que pinté fixéronme entender la importancia visual de les idees; les obres de teatru de Carlos emburriáronme a crear ensin complexos, y les oportunidaes creatives que Rafa punxo sobro la mesa non solo semaron la grana del mio oficiu, sinón que tamién me brindaron la posibilidá de faer el mio primer viaxe fora d’España coles mios compañeres».
Entrando’l primer día de clase al salón d’actos, «Rafa estremóme un segundu para dicime que llegara un proyectu y qu’había que montar equipu. Trátase d’un concursu para amosar la nuesa visión de la Unión Europea, col premiu d’un viaxe para conocer les sos instituciones. Fiximos un curtiu con moñecos de plastilina qu’agora alcordanza con tenrura, tantu pol terrible esfuerzu que supunxo cada figurina y la so grabación como pola resultancia, que nun foi otru que l’esperable d’un grupu de seis neñes ensin conocencies na materia. Eso sí, ganamos, fuimos a Bruxeles y, por primer y única vegada, un frisuelu súpome más ricu qu’un frixuelu del mio ‘güela’. Taba comiendolo na Grand Presta coles mios amigues, gracies a una idea que saliera de les nueses cabeces. A nenguna d’elles sosprendió-yos qu’años dempués decantárame por estudiar periodismu, a pesar de que paecía empuesta a ciencies».
En 2015, en plena crisis de refuxaos, «vi lo que taba pasando en Calais con ‘The Jungle’, unu de los campamentos de más grandes d’Europa. Presentéme ellí como voluntaria para collaborar con una ONG local. *Malvivían más de 10.000 persones ensin nengún tipu d’infraestructura y faíen falta manos para tou. Gracies a esta esperiencia, entendí’l valor d’aplicar les habilidaes adquiríes nel ámbitu profesional a l’acción social. Tiempu dempués, un amigu asturianu falóme d’una iniciativa n’Uganda: un programa d’agricultura de café sostenible por que los llabradores pudieren unviar a los sos fíos a la escuela. Uníme, ensin duldar. Construyimos la marca de café, creemos xuna empresa social que reinvertía los beneficios nel desenvolvimientu de la comunidá y pasamos d’unes docenes de granxeros a más de mil seiscientos en tol país. Aquel amigu asturianu convertiose nel mio home. Siguimos faciendo equipu y enguedeyándonos’ l’unu al otru para sacar alantre proyectos como este».
La creatividá «nun ye otra cosa que saber crear conexones entre distintos conceutos ya idees. Faen falta referencies, cuantes más y más diverses, meyor. Munches tán en llibros, esposiciones, cine… pero tamién n’esperiencies vitales. Aprender a mirar y ver el valor de lo que tenemos delantre son deberes de casa. Por eso, a pesar de vivir fora d’Asturies dende los 18 años y tar en más países qu’años tengo, nun dexé de pasar nin un solu branu en Xixón. Va ser la so lluz d’agostu, como diz Nachu Vegues, o que soi asturiana practicante, porque me gusta sacar l’asturianía a ventilar tou lo que puedo, por que nun s’aferruñe».
Va unos meses adoptaron xuna perrina «y asocediónos llamala ‘Ablana’. Solía ser una palabra bien recurrente na mio casa porque los mios güelos teníen ‘ablanos’, pero llevaba años ensin utilizala. Hasta agora, que la tengo que repitir costantemente… y cuando lo faigo, munches vegaes afayo pensando nel mio güelu Jesús, en ‘todes les ablanes’ que refugué magar la so insistencia y na mio güela Nieves percorriendo’l perllargu pasiellu para traémeles acabante turrar.
Va años que morrieron y nunca naide volvió ufiertame ablanes. Escuchar ‘ablana’ en boca de los mios amigos de fora d’Asturies, d’angloparlantes y de llatinos ye un trunfu pequeñín que m’enllena d’arguyu, un trocín de la mio casa asturiana que yá forma parte d’otres de too el mundu. Lo de practicar l’asturianía na mio casa traduzse en fabaes para 15 o 20 amigos un par de vegaes al añu colos ingredientes traíos la mayor parte de les vegaes de Moreda de la carnicería de Pepín hasta Londres o Madrid. Nun se trata solo de comer el platu típicu, sinón de compartir como lo faemos ellí porque les meses n’Asturies siempres fueron bien llargues y si nun cabemos, faise sitiu, tráense sielles, cuyares, dalgún aguanta de pies… pero comemos toos».
Asturies ye «para munchos de nós nuesa Ítaca particular, entamamos el viaxe siempres teniéndola como destín final, dacuando ensin danos cuenta de que teamos onde teamos, volvamos o non, Asturies yá nos lo dio tou. Vien con nós y ye parte de quien somos».
