- Fonte: LNE / Actualidá Asturies / LNE /
El Manneken Pis, que tien más de mil traxes, estrena traxe vaqueiru, asina lluz la popular escultura que ye tou un símbolu na capital belga. El Centru Asturianu de Bruxeles festexa’l so 40 aniversariu regalándo-y un nuevu vestuariu. Imaxe
¡El Manekken Pis de Bruseles tuvo mui asturianu el pasáu fin de selmana y hasta mexó sidra!
El Manneken Pis ta d’estrenu. Güei vistióse col so nuevu traxe d’asturianu, que sustitúi al que fai casi 40 años regalára-y el Centru Asturianu de Bruxeles. Tolos años, el tercer domingu de setiembre, la célebre escultura, bien próxima a la Grand-Presta de Bruxeles, viose col típicu calzón, el chalecu y el restu de les prendes del traxe rexonal, y tolos años, esi día, en cuenta de mexar agua, mexa sidra. Fízolo nesa fecha coincidiendo col festival «Folclorísimo». Anguaño tamién lo fixo ayeri, pa llucir el so traxe nuevu y celebrar el 40 aniversariu del Centru Asturianu en Bruxeles.
La directora xeneral d’Emigración y Polítiques de Torna, Olaya Romano, viaxó a Bruxeles pa participar nel festexu entamáu arremente na céntrica rue de l’Etuve. Tamién asistió’l conseyeru de la Embaxada d’España en Bruxeles, Adrián Romero.
Eva Buelga, la presidenta del Centru Asturianu de Bruxeles, cuntó que la entidá, qu’anguaño cunta con unos 120 socios, constituyóse oficialmente en 1986, anque la iniciativa data d’abril de 1985 y xestóse nos alcuentros qu’un grupu d’emigrantes asturianos caltenía nun chigre, nel qu’echaben la partida y allixeraben la señardá.
Por eso, pa celebrar los 40 años del Centru, quixeron presentar güei el so regalu al Manneken Pis, símbolu d’una ciudá na que moren anguaño 8.000 asturianos, de delles xeneraciones, la comunidá más numberosa del continente européu y la quinta a nivel mundial. El so grupu de baille, los sos gaiteros y les sos pandereteres acompañaron la fiesta nes cais de Bruxeles.
