Asturies estrena la temporada de branu del aeropuertu con 30 destinos directos, la mayor ufierta de la hestoria. Hasta ochobre tán previstos 8.686 vuelos regulares, de los cualos 2.006 van ser internacionales, y un total de 1,4 millones de places. El Principáu va tener conexón directa per primer vegada con cuatro ciudaes andaluces y colos trés capitales de la Comunidad Valenciana.
La Estratexa de Conectividá Aérea asitia la terminal de Santiago del Monte como la octava del país con más rutes nacionales y la segunda de la España Verde. Asturies estrena esta medianueche la temporada de branu del aeropuertu cola mayor ufierta de la hestoria: 30 destinos directos, que van suponer una ufierta global de 1.460.000 places en rutes regulares.
La Estratexa de Conectividá Aérea que punxo en marcha’l Gobiernu del Principáu en 2019 llogró que la terminal de Santiago del Monte asítiese como la octava del país con mayor ufierta de destinos nacionales (19) y la segunda de la España Verde, solo por detrás de Bilbao. Per delantre del aeropuertu d’Asturies en númberu de rutes interiores asítiense Mallorca (32), Barcelona (30), Madrid (29), Málaga (22), Valencia (22), Sevilla (20) y Bilbao (20).
Dende’l 30 de marzu al 25 d’ochobre, tán previstos 8.686 vuelos regulares: 2.006 a destinos internacionales y 6.680 a aeropuertos españoles.
Anguaño incorpórense al catálogu de rutes directes les de Xerez, Castellón y Melilla, coles que s’algama 19 destinos nacionales. Asina, nos próximos meses podrá volar ensin escales dende Santiago del Monte a Madrid, Barcelona, Sevilla, Valencia, Alicante, Castellón, Palma de Mallorca, Menorca, Eivissa, Xerez, Granada, Málaga, Gran Canaria, Tenerife Sur, Tenerife Norte, Fuerteventura, Lanzarote, Melilla y Murcia.
Per primer vegada, Asturies va tar conectada simultáneamente con cuatro ciudaes andaluces: Sevilla, Málaga, Xerez y Granada. Les conexones con Andalucía, operaes por Volotea, algamen les 537 frecuencies d’ida y vuelta y 170.000 places directes ente les dos comunidaes mientres la temporada de branu. Sevilla y Málaga van cuntar con siete frecuencies selmanales y Granada y Xerez, con dos.
Amás, Asturies va tar conectada colos trés aeropuertos de la Comunidad Valenciana, tamién per primer vegada. P’Alicante y Valencia va haber siete frecuencies selmanales y para Castellón, dos. D’esta miente, van algamase casi 150.000 places nes 465 conexones que Volotea tien programaes hasta finales d’ochobre.
350.000 places internacionales. La ufierta de places internacionales na temporada de branu va algamar les 350.000 a once destinos europeos. D’últimes, van efectuase 2.006 operaciones nes rutes regulares a Lisboa, Londres, Bruxeles, París, Ámsterdam, Düsseldorf, Múnich, Frankfurt, Milán, Roma y Venecia.
Cabo señalar l’aumentu a cinco frecuencies selmanales de la ruta a París, según la medría de los vuelos a Bruxeles con trés conexones selmanales, que yá s’ufierta dende febreru. Nel casu de Londres, l’aeropuertu de Gatwick va tener xuna salida diaria (sacante los xueves) operada por Vueling.
El tráficu internacional representó en 2024 el 22,8% del total nel aeropuertu asturianu, xuna cifra que se multiplicó por ocho en cinco años. Les rutes qu’esperimentaron mayor crecedera fueron les de Francia (31,5%), Portugal (28,6%) ya Italia (14,3%).
El Gobiernu d’Asturies caltien el so apueste por impulsar la Estratexa de Conectividá Aérea p’algamar los 38 destinos directos y los 2,5 millones de pasaxeros añales en 2033. Con esti fin, el Principáu volverá tar presente a principios d’abril na feria Routes Europe, el mayor foru européu profesional del sector de l’aviación, qu’anguaño se celebrará en Sevilla.
Per otra parte, a la ufierta de rutes regulares d’esta temporada sumaránse aquelles impulsaes por operadores turísticos y axencies de viaxes, 18 en total, pa destinos como Marrakech, Cracovia, Cabu Verde, Madeira, Atenes, Eslovenia, Escandinavia o Exiptu.
El Consorciu de Tresportes d’Asturies (CTA) va caltener nestos meses la ufierta de 60 frecuencies diaries pa conectar Uviéu, Xixón, Avilés y Castrillón col aeropuertu. Esta parrilla de servicios toma tola operativa aérea y facilita la llegada a la terminal en tresporte públicu, con un serviciu incluyíu dientro de la plataforma de movilidá CONECTA.
Madrid vuelve dar nales a Asturies. La ruta aérea con Baraxes recupera’l lideralgu nel aeropuertu asturianu al ser utilizada por unu de cada cinco viaxeros.
