- Fonte: Paesica /paesica/San Martín de Luiña/ theasturianer
- THE ASTURIANER N 033 / «VAQUEIRINA» / Autora: VANESSA RIESGO alias PAESICA. @paesica ./ @theasturianer.
Esta portada ye un homenaxe al que probablemente sía’l grupu social más puru y llibre de lo qu’entendemos como la esencia d’Asturies: Los Vaqueiros d’Alzada.
Gaspar Melchor de Xovellanos definió a los habitantes de les brañes como “vaqueiros” porque vivíen de la cría de ganáu vacuno, y “d’alzada” porque’l so asientu nun ye fixu, sinón que “alcen” la so morada y residencia para emigrar añalmente al llegar la primavera, coles sos families y ganaos a les altes camperes.
Los vaqueiros rixen la so vida y costumes n’una máxica comunión cola naturaleza. Para’l mes de mayu les families xubíen col ganáu hasta los montes del interior en busca de frescos praos para tornar de cara al iviernu a les brañes más próximes a la mariña onde les comunidaes vaqueires desenvolvíen les sos actividaes.
La so población estiendese pelos conceyos de Tinéu y de L.luarca y les sos xentes destaquen amás de pola so solidaridá y hospitalidá por un fondu sentíu artísticu que se manifiesta na so vestimienta, los sos cantares, les sos costumes y el so formosu dialectu, ensin influencies esternes a pesar de que mientres sieglos sufrieron la marxinación de la ilesia y de los Xaldos (los llabradores sedentarios).
Vanessa Riesgo sol seudónimu de Paesica recurre a distintes técniques artístiques que van dende la cerámica, la serigrafía, el grabáu y l’ilustración para recrear un imaxinariu etnográficu inspiráu na cultura Asturgalaica. La so trayectoria profesional llevó-y a esponer en diversos museos de la cornisa atlántico y cantábrico, desenvolviendo una interesante xera documental y recopilatoria nel ámbitu de les tradiciones nel ámbitu rural.
La semana pasada una vaqueira de la Braña de Busindree paseose por el feed de @theasturianer, col pandeiro bien garrao cola manos ya faciéndolo sonar con xeito. Un tributo nun solo a la mio bolita de Texidiellu ya’l mío bolito de Brañaseca, sino a to la familia vaqueira que tengo desperdigada por las brañas de Cuideiru, Salas ya L.luarca.
