El trabayu ufierta un analís detalláu de la biodiversidá vexetal d’esta ecorrexón y destaca la importancia de la ciencia ciudadana y la necesidá de validación científica para ameyorar el caltenimientu d’especies reinales y amenaciaes | L’estudiu arrexunta más de 200.000 rexistros d’especies dende l’añu 2000 hasta 2024 y pon en valor la participación de la ciudadanía al traviés de plataformes como iNaturalist | Los autores destaquen que factores como’l cambéu climáticu, la perda de biodiversidá y l’acción humana inflúin na composición y distribución de les especies nesta ecorrexón, lo qu’esixe estratexes de caltenimientu qu’integren conocencia local con marcos globales | La investigación foi realizada por un equipu multidisciplinar lideráu por Eduardo Cires, profesor titular de Botánica del Departamentu de Bioloxía d’Organismos y Sistemes ya investigador del Institutu de Recursos Naturales y Ordenación del Territoriu (Indurot).
Un equipu multidisciplinar d’investigadores lideráu por Eduardo Cires, profesor titular de Botánica del Departamentu de Bioloxía d’Organismos y Sistemes ya investigador del Institutu de Recursos Naturales y Ordenación del Territoriu (Indurot) de la Universidá d’Uviéu, publicó na revista Naturalia Cantabricae el primer estudiu refechu sobro la flora de los montes mistos cantábricos.
Col títulu Flora del Cantábricu: xuna visión glocal, el trabayu ufierta un analís detalláu de la biodiversidá vexetal d’esta ecorrexón y destaca la importancia de la ciencia ciudadana y la necesidá de validación científica p’ameyorar el caltenimientu d’especies reinales y amenaciaes.
Un cuartu de sieglu de datos pal caltenimientu
L’estudiu, qu’arrexunta más de 200.000 rexistros d’especies dende l’añu 2000 hasta 2024, pon en valor la participación de la ciudadanía al traviés de plataformes como iNaturalist. Sicasí, los autores alverten sobro los sesgos na distribución de los datos, una y bones les especies más llamatives y accesibles suelen tar sobrerrepresentadas, ente que la flora reinal y en peligru críticu recibe menos atención.
Una visión ‘glocal’ de la biodiversidá
El conceutu de visión glocal aplicáu nel estudiu sorraya la necesidá d’analizar la flora del Cantábricu tantu dende una perspectiva global como local. Los autores destaquen que factores como’l cambéu climáticu, la perda de biodiversidá y l’acción humana inflúin na composición y distribución de les especies nesta ecorrexón, lo qu’esixe estratexes de caltenimientu qu’integren conocencia local con marcos globales.
Retos y futuru de la ciencia ciudadana na botánica
Magar la ciencia ciudadana demostró ser xuna ferramienta clave pal siguimientu d’especies, l’estudiu señala la importancia de complementar estos datos con fontes científiques consolidaes. Los investigadores encamienten a fortalecer la collaboración ente espertos y la ciudadanía p’ameyorar la precisión de los rexistros y garantizar que la información arrexuntada pueda ser utilizada en polítiques de caltenimientu efectives.
Escontra una xestión sostenible de los montes mistos cantábricos
Esti trabayu sienta les bases para xuna meyor comprensión de la flora de la rexón y suxure estratexes pa optimizar la xestión de los ecosistemes forestales. El caltenimientu de los montes mistos cantábricos ye crucial non solo pola so riqueza biolóxica, sinón tamién polos servicios ecosistémicos qu’ufierten, como la captura de carbonu y la regulación hídrica.
Referencia:
Cires, E., Cuesta, C., Estrada Fernández, A., Madrazo-Frías, L.M., López-Alonso, R., González-Toral, C., Moriano-González, L., Torralba-Burrial, A., Colina, A., Garcia-de-la-Fuente, L., Fernández Iglesias, E., Fernández-García, M., Sanna, M. y Rodríguez Gallego, J.L. 2025. Flora del Cantábrico: una visión glocal. Naturalia Cantabricae 13(2): 39-69. Enlace: https://www.indurot.uniovi.es/actividad/publicaciones/naturalia/numero13
