- Fonte: El Comercio / Educastur /
- Calendario escolar 25-26 (pdf) / Calendario 25-26. E. Infantil 0-3 años (pdf)
Ye unu de los momentos más esperaos por families y docentes: conocer el calendariu escolar del siguiente cursu. Güei la Conseyería d’Educación presentó la so propuesta, que vuelve ser unificada para Infantil, Primaria, Secundaria y Bachilleratu para’l cursu 2025-2026, que dende va dos años empiecen y acaben al empar, al contrariu de lo qu’asocedía antes.
Pero, ensin dulda, la cuestión que xenera más alderique siempres son lo qu’Educación denomina «periodos de respiru», esto ye, descansos más o menos llargos, y una vegada más va haber unu por trimestre. Fai esactamente diez años que los sindicatos educativos abrieron l’alderique sobro la duración y modelu de los trimestres. Proponíen pasar del modelu de los trés grandes periodos lectivos a unu de cinco, más curtios y con mayores periodos de descansu en mediu. Falaben del ‘modelu pedagóxicu’.
Aquel modelu nunca se llegó a aplicar porque nunca hubo unanimidá ente les partes implicaes, principalmente ente los sindicatos y les families. Pero, col tiempu, diose con una especie de modelu híbridu’ que dexa incorporar a metá de cada unu de los trés trimestres varios díes non lectivos.
La propuesta que presentó Educación afita l’entamu del cursu’l 9 de setiembre de 2025 y la so final, el 19 de xunu. Van Ser, en total, 177 díes lectivos, distribuyíos en períodos de 70, 54 y 53 pa cada unu de los trimestres. A esta cifra, hai que descontar los dos festivos locales de cada conceyu. Les vacaciones de Navidá suman 19 díes (del 20 d’avientu al 7 de xineru), xuno más que l’actual cursu, y les de Selmana Santa, otros 9 (del 28 de marzu al 5 d’abril).
