Rescatada una osezna de trés meses en Teberga en fracasando dellos intentos de realcuentru cola so madre. L’animal, bautizáu como «Alba», foi alcontráu pola Fundación Oso Pardo y recuperáu por axentes del Mediu Natural. La Conseyería de Mediu Rural va proponer reintroducila nel oriente asturianu como refuerzu xenéticu.
- Fonte: LNE / FPO Instagram /
El Gobiernu d’Asturies rescató’l pasáu esta fin de selmana una osezna de trés meses y 2.090 gramos de pesu nel conceyu de Teberga, en constatando que nun yera posible’l realcuentru cola so madre en condiciones de seguridá. L’animal, bautizáu como «Alba», foi topáu’l miércoles polos axentes del Mediu Natural, nel marcu del programa de siguimientu d’oses con cría. Foi entós cuando s’activó la vixilancia siguida, col oxetivu prioritariu de favorecer un acercamientu natural ente la madre y la cría.
Como midida preventiva, y énte la posibilidá de que la osa permaneciera nes proximidaes, el Principáu suspendió de forma inmediata l’accesu a les rutes de senderismu y a les zones d’esguilada de la redolada.
Ensin feríes nin patoloxíes
La localización definitiva foi na madrugada del sábadu, gracies a la comunicación de la Fundación Oso Pardo (FOP). Un axente del Mediu Natural procedió entós a la so recoyida, énte’l riesgu creciente de deshidratación. Alba foi treslladada a una clínica veterinaria n’Uviéu, onde se confirmó que nun presentaba mancaes nin patoloxíes.
El domingu volvió valorase técnicamente la posibilidá d’un realcuentru cola madre, que foi nuevamente refugáu por razones de seguridá. Optose pol so treslláu al Centru de Recuperación de Fauna Montesa de Cantabria, perteneciente a la Conseyería de Desenvolvimientu Rural, Ganadería, Pesca y Alimentación del Gobiernu de la comunidá vecina, especializáu nel manexu d’esbardos en condiciones controlaes, onde s’evita’l contactu humanu y garantízase xuna vixilancia continua.
La decisión foi consensuada por técnicos del Serviciu de Vida Montesa, el Serviciu d’Axentes del Mediu Natural, la Fundación Oso Pardo, la Fundación Oso Asturies ya investigadores del Institutu Mistu d’Investigación en Biodiversidá del Conseyu Cimeru d’Investigaciones Científiques (IMIB-CSIC).
La Dirección Xeneral de Planificación Agraria, como órganu competente en materia de fauna montesa, coordinóse l’actuación en función de los protocolos establecíos y informóse en tou momentu al Grupu de Trabayu del Osu Cantábricu.
El destín final de «Alba» va proponese nel senu de dichu grupu. La Conseyería de Mediu Rural va proponer reintroducila nel oriente asturianu como refuerzu xenéticu, lo qu’afitaría la meyora de la pervivencia de la especie. Trátase d’una midida que va en coherencia colos criterios de caltenimientu establecíos a nivel nacional.
El Gobiernu d’Asturies sorraya que toles decisiones empunxéronse por criterios técnicos y pol principiu de precuru, coles mires de salvaguardar el bienestar del animal, garantizar la seguridá de les persones participantes y contribuyir al caltenimientu del osu pardu cantábricu.
