- 🗓️ La Selmana de les Lletres Asturianes ye l’actu cultural más importante del añu pa la promoción de les llingües y la cultura d’Asturies. Descarga equí’l programa d’actos de la 46 Selmana de les Lletres Asturianes.
Cultura presenta’l programa d’actos de la 46 Selmana de les Lletres Asturianes, qu’homenaxa a Xosé Álvarez, Pin, esponente de la lliteratura asturiana de la diáspora.
- La conseyería edita l’antoloxía Per toa tierra cola que quier rindir homenaxe a la emigración y el so papel como difusora de la cultura asturiana
- El maestru Óliver Díaz va dirixir a la OSPA nel Conciertu de les Lletres Asturianes
- Los actos, qu’incluyen presentaciones de llibros, conciertos, la entrega de premios de certámenes escolares o la inauguración d’una esposición y l’estrenu d’un documental, celébrense en Balmonte, Uviéu, Candás, Tapia y Madrid
La Selmana de les Lletres Asturianes, organizada pol Gobiernu d’Asturies dende hai 46 ediciones, rinde homenaxe esti añu a Xosé Álvarez, Pin (1948-2001), figura clave na primer promoción del Surdimientu y ún de los máximos exponentes de la lliteratura asturiana de la diáspora.
Pin mantuvo viva la cultura asturiana dende Arxentina, pa onde emigró bien mozu, y más tarde dende Madrid, onde siguió nutriendo la lliteratura infantil en llingua asturiana y vinculóse a asociaciones mui actives na defensa de les llingües y cultura d’Asturies. El llibru Xosé Álvarez, Pin. Asturies siempre y el documental Xosé Álvarez y el Conceyu d’Asturies en Madrid, editaos pol Gobiernu asturianu pa la ocasión, analicen con detalle la trayectoria d’un autor que s’adelantó cuasi nuna década al Surdimientu, escribiendo’l so primer cuentu n’asturianu en 1966, con 18 años.
L’actu institucional de la Selmana va celebrase’l día 5 de mayu en Balmonte, conceyu natal de Xosé Álvarez, onde se va descubrise una placa conmemorativa y va inaugurase una esposición representativa del so legáu qu’inclúi numberosos testimonios gráficos de la so vida y obra. Un conciertu homenaxe al cargu del cantautor Rafa Lorenzo, nel que va estrenase un cantar dedicáu a Pin, va zarrar los actos d’esti día.
Pin recibió’l Premiu «Urogallo de Bronce» na categoría lliteraria del Centru Asturiani de Madrid en 1990, y dio nome a un concursu de cuentos n’asturianu que convocaba esi mesmu centru nos primeros años del sieglu xxi. Por ello, Madrid va acoyer nesta ocasión l’actu de piesllu de la Selmana de les Lletres, el día 14 de mayu y cola presentación d’otra obra que’l Gobiernu asturianu edita pa poner en valor la lliteratura asturiana vinculada a la emigración: Per toa tierra, antoloxía coordinada por Arantza Margolles Beran y que se va distribuyor a tolos centros asturianos. Esti llibru, dedicáu a la emigración asturiana, pon en valor la lliteratura escrita n’asturianu vinculada a la diáspora. Con esti volume quier rindise homenaxe a la emigración, abordada por diversos autores de diferentes xeneraciones.
A esta celebración organizada pol Gobiernu d’Asturies únense múltiples instituciones y participen de manera especial los centros educativos, les llibreríes, les editoriales o los escritores. El programa d’actos inclúi amás la celebración d’un conciertu de la Orquesta Sinfónica del Principáu d’Asturies, que baxo la batuta del maestru Óliver Díaz, va interpretar obres de Falla, Bizet, Korsakov o Lauret. Les invitaciones pa esti conciertu pueden retirase de baldre dende’l 28 d’abril na páxina web de la OSPA.
Con motivu de la 46 Selmana de les Lletres Asturianes, la Conseyería de Cultura, Política Llingüística y Deporte edita asina mesmo’l poemariu n’eonaviegu El equilibrio delicado del funámbulo, de Conchita Álvarez Lebredo, que va presentase’l 10 de mayu en Tapia nun actu que va incluyir tamién la representación del espectáculu de danza El viaxe del andolía, qu’a cargu de Produccines Nun Tris aborda’l fenómenu de la emigración dende una perspectiva contemporánea.
Esti poemariu pal estremu occidental d’Asturies, y el yá citáu Xosé Álvarez, Pin. Asturies siempre pal restu de la comunidá, son les obres que se van poner a disposición de baldre pa les persones que compren un llibru o un discu n’asturianu o n’eonaviegu’l vienres 9 de mayu, Día de les Lletres Asturianes. Cincuenta llibreríes y tiendas de discos del Principáu d’Asturies collaboren esti añu cola Conseyería de Cultura na promoción y celebración de Les Lletres.
- Programa de actos 46 Selmana de les Lletres Asturianes
- Cartel de la Selmana de les Lletres Asturianes
- Cartel de la Selmana de les Lletres Asturianes Eonaviego
- NP 46 Selmana de les Lletres Asturianes
- La 46ª Selmana de les Lletres Asturianes homenaxa a Xosé Álvarez «Pin» 🗓️ La Selmana de les Lletres Asturianes ye l’actu cultural más importante del añu pa la promoción de les llingües y la cultura d’Asturies. Cada mes de mayu, reconocemos la trayectoria de figures que dexaron una buelga fonda na lliteratura asturiana.💙💛 Esti 2025, la 46ª edición ta dedicada a Xosé Álvarez «Pin» (1948–2001), ún de los pioneros del Surdimientu lliterariu, emigrante a Arxentina y activista cultural en Madrid. Pin escribió’l so primer cuentu n’asturianu en 1966 foi pieza clave del Conceyu d’Asturies en Madrid y ganó’l Premiu Urogallo de Bronce pol so llabor cultural.🗒️La programación d’esti añu vien cargada d’actividaes nel so honor destacando: 5️⃣ de mayu en Balmonte: actu institucional, descubrimientu d’una placa n’honor de Pin y inauguración d’una esposición sobre la so vida y obra. 🎶 Conciertu de Rafa Lorenzo, que va estrenar un cantar dedicáu a Pin. 📚 Presentación del llibru «Xosé Álvarez, Pin. Asturies siempre» y estrenu del documental «Xosé Álvarez y el Conceyu d’Asturies en Madrid». 1️⃣4️⃣ de mayu en Madrid: actu de zarru cola presentación de l’antoloxía «Per toa tierra, un homenaxe a la lliteratura asturiana de la diáspora».🌎 Esta edición quier dar visibilidá al papel de la emigración asturiana nel mantenimientu y proyección de la nuestra cultura y les nuestres llingües nel mundu. Un reconocimientu merecíu a toles persones que, como Pin, nun dexaron que la so llingua y la so cultura morriere, anque tuvieren lloñe d’Asturies.
