- Fonte: El diario /
El cayente del turismu rural n’Asturies qu’apura soluciones: “Nunca tuvimos un iviernu tan negru como este”. El Principáu ye la comunidá autónoma con mayor númberu de cases rurales por habitante con un total de 1064 unidaes, pero’l problema nun ye la ufierta, ye que falta demanda, según reclama’l sector.
Llueñe quedaron los tiempos nos que los turistes viaxaben a Asturies mientres una o dos selmanes o inclusive un mes para esfrutar d’una casina rural en plena naturaleza. El sector clama por midíes urxentes para intentar reflotar esti tipu de turismu, que nació n’Asturies na década de los ochenta, con una finalidá clara: que les persones que viven nel mediu rural pudieren compatibilizar otres actividaes cola xestión d’una casa o apartamentu rural que-yos apurriera un complementu económicu.
Asturies dispon de 9,9 cases rurales por cada 10.000 habitantes, lo qu’asitia al Principáu, con 1.064 unidaes d’esti tipu d’establecimientos hosteleros, como la comunidá autónoma con mayor númberu de cases rurales por habitante.
El turismu rural ye una fórmula p’afitar población, déxate vivir nel pueblu compatibilizando con otres actividaes o te dexaba, porque esti iviernu foi bien negru
“El 50% de los pueblos que güei siguen habitaos ye pol turismu rural, ye una fórmula p’afitar población y que te dexa vivir nel pueblu compatibilizando con otres actividaes o te dexaba, porque esti iviernu foi bien negru”. Refierse Benignu Pérez non solo a los sos agospiamientos rurales, tien trés apartamentos y una casa, onde nun tuvo nenguna reserva dende la ponte de la Constitución hasta Selmana Santa, sinón tamién al enclín del sector, que conoz perfectamente. Benignu Pérez cree que falta sofitu de l’Alministración, “perdióse absolutamente’l contactu, antes axuntábamos trés o cuatro vegaes al añu y teníamos la Sociedá Rexonal de Turismu, agora nada; bonalmente nun sabemos nin en qué tán invirtiendo’l dineru”, repostia.
Dellos son los motivos qu’analicen les asociaciones y espertos del sector y que tán influyendo negativamente nel esbarrumbe de l’arribación turística nel mediu rural asturianu. Ana Llanu, presidenta de l’asociación de turismu rural Fontes del Narcea, concreta que’l modelu de turista camudó totalmente.
“Antes la xente venía braniar, a pasar unos díes na naturaleza, a esfrutar de la mesma casa. Agora la xente quier viaxar, viaxar y viaxar. Venir a Asturies, comer un cachopu, visitar Cuideiru y vanse. Lo qu’importa ye viaxar, dicir que viaxes enforma, pero les estancies cayeron”, concreta. Toos comparten esta opinión, el turista camudó y agora yá non solo quier naturaleza, quier conexones a internet, bones carreteres, ufiertes pa faer cicloturismu, a última hora, quier esperiencies y eses esperiencies “son más fáciles d’atopar nuna ciudá que nun pueblu”, concreta Ana Llanu.
Ana Llanu, presidenta de l’asociación de turismu rural
Fontes del Narcea, intervien na Feria I. de Turismu (FITUR)
Con esti panorama tan poco optimista, el sector reclama más campañes específiques y que se meta mano a los establecimientos illegales, que siguen siendo munchos, y que faen bien de dañu, asegura Elvira Gayol propietaria de dellos establecimientos de turismu rural en Castropol. “Solo ente A Veiga y Navia tenemos 90 agospiamientos illegales, y ende tán, ensin pagar impuestos”, concreta, Benignu Pérez.
Jaime García, presidente d’Arca apunta a que ye’l momentu de faer una reflexón fonda. “Fuimos los inventores del turismu rural y tamién los de la sidra, pero agora’l visitante quier otres coses”. Refierse García a qu’hai qu’ufiertar paquetes en cada zona d’Asturies con actividaes específiques venceyada a la redolada nes que’l visitante tenga opciones.
“Trátase de dir más allá, de promocionar sitios concretos; esto ye, qu’el que busque paisaxe pueda dir a Los Oscos y faer delles rutes; qu’el que quiera faer marches en bicicleta vaiga a Mieres y conoza tamién la cultura minera, y el que quiera conocer Cuadonga y Los Llagos visite Cangues d’Onís y sepa tamién un bon sitiu pa comer, una sablera que visitar”.
Jaime García, presidente de l’Asociación
d’Agospiamientos Rurales d’Asturies (ARCA)
Toos coinciden en que la desestacionalización sigue siendo la gran cuenta pindia del turismu rural y pa rompela hai que promocionar más Asturies, dientro d’Asturies. “Dende Arca siempres ufiertamos agospiamientos con actividaes, tenemos qu’afaenos a lo que busca’l turista. La xente quier faer munches más coses en menos díes y ye básicu que nós mesmos, los asturianos, conozamos el nuesu territoriu. Nunca tuvimos tan bien comunicaos, tanto por avión como por tren y agora hai que llograr que la xente quiera venir a Asturies”, señala’l presidente d’Arca.
Otru de los aspeutos qu’afectó al turismu rural ye la proliferación d’agospiamientos d’Airbnb, más ufierta pa quedase a dormir y ye ende onde’l turismu rural tienen que saber estremase y ufiertar daqué más qu’un sitiu onde pasar la nueche.
Dende’l Principáu d’Asturies llanzóse una campaña qu’animaba a los asturianos a conocer Asturies, precisamente dirixida a fomentar el turismu rural y toles campañes funcionen, pero les asociaciones precisen más sofitos. “Tenemos que faer congresos y analizar bien les causes, escuchar a los veceros y a los propietarios, y precisamos un plan de choque empobináu y bien diseñáu pa poder romper cola estacionalidá. Nun dexamos de ser agospiamientos fixos discontinuos”, concreta’l presidente d’Arca, que repostia que “ensin pueblos, nun hai paraísu”.
Elvira Gayol, qu’acaba de xubilase, reconoz que cola ocupación d’agora mesmu “yá nun somos rentables, yá nun podríamos vivir del turismu rural, antes díbamos tirando, pero esti iviernu foi nefastu y precisamos una promoción específica y publicidá, sofitu de l’Alministración, porque somos un sector esencial p’Asturies”.
Nós somos los que conocemos bien el territoriu, los que podemos aconseyar. Múltiples causes que riquen un cambéu de modelu pa poder caltener vivos estos agospiamientos y que tamién sufren les consecuencies de los influencers que faen conteníu sobre ónde comer, qué visitar o qué rutes faer ensin tener en munches ocasiones les claves necesaries. “Nós somos los que conocemos bien el territoriu, los que podemos aconseyar qué faer o qué ver, agora hai cientos de ceadores de conteníu que saquen la semeya a un cachopu enorme y encamienten ensin saber si de verdá ye un sitiu recomendable, por eso dende Arca tenemos un foru onde los propietarios encamienten restoranes a los que de verdá merez la pena dir. Hai demasiada información, pero non toa ye fiable”, concreta, Jaime García.
Coles mesmes, dende’l Principáu caltienen una visión más optimista. “Tamos trabayando de la mano del sector pa siguir impulsando’l turismu rural, unu de les pilastres de la nuesa ufierta turística. Pa ello constituyóse una mesa específica de trabayu’l pasáu añu y tánse impulsando midíes en realizando un diagnósticu d’esti segmentu turísticu n’Asturies”, espliquen dende Turismu.
Amás, púnxose en marcha una estratexa específica qu’inclúi un programa de bonos de descuentu pa fomentar les estancies n’agospiamientos rurales en temporada media y baxa, según un plan de promoción dotáu con 1,7 millones d’euros que contempla más de 30 acciones pa reforzar productos como’l ecoturismu, el senderismo o’l cicloturismu.
Asturies Paraísu Natural: la campaña que fai 40 años, en plenu boom del turismu de sol y sablera, apostó pelos montes
Tamién se caltienen actives les campañes empobinaes al turismu internu, como “¿Seguru que conoces Asturies?”, vixente dende 2024 y que va tener continuidá anguaño. Hai qu’esperar a ver qué asocede’l próximu iviernu y si de verdá les midíes tomaes son abondes por que’l turismu rural recupere’l pulsu perdío.
