- RTPA /
Asturies lideró nel cursu 2022-2023 el ranquin nacional na tasa bruta de titulación en Secundaria, con un 87,3 %, y foi la tercer comunidá con mayor promoción d’alumnáu en 6.º de Primaria, con un 98,9 %, tollo con una inversión n’Educación que xubió a 780,6 millones d’euros.
Son dalgunos de los datos que s’esprenden del informe ‘Estáu y situación del sistema educativu asturianu 2022-2023’, ellaboráu pol Conseyu Escolar del Principáu d’Asturies y presentáu esta mañana pola so presidenta, Mari Lluz Pontón, y la conseyera d’Educación, Lydia Espina.
L’informe asitia a Asturies na cuarta posición nacional tocantes a gastu públicu por alumnu, con 8.140 euros na enseñanza pública, y destaca que los 780 millones invertíos n’educación mientres ese curso suponen una medría de 103 millones en solu trés años, a pesar del descensu de 2.329 estudiantes n’ese mesmu periodu.
Espina valoró l’informe y estimó que se publicara, per primer vegada, en castellán y asturianu, “una iniciativa qu’enllaza con toles midíes que tamos adoptando na conseyería para la promoción y usu de les nueses llingües autóctones”.
- Precisamente, una de les novedaes del informe ye la inclusión del porcentaxe d’alumnáu qu’escueye l’asignatura optativa d’asturianu y eonaviego, qu’en primaria supon el 48,1 % del alumnáu y casi el 42 % de la enseñanza pública nesta etapa educativa.
- En Secundaria, los porcentaxes fueron del 15,2 % y el 13 %, respectivamente.
- Tocantes a la ratio d’alumnáu per profesor, el Principáu y Galicia ocupen el tercer y cuartu llugar a nivel nacional, con 9,9 estudiantes per docente, solo por detrás de Cantabria y Estremadura.
La conseyera recordó la implantación, dende esti cursu, del amenorgamientu progresivu de la ratio a 23 estudiantes per aula en toles etapes educatives.
Asturies, a la cabeza en titulación en Secundaria. Tocantes a resultancies académiques, Asturies lidera la clasificación nacional na tasa bruta de titulación en Secundaria, con un 87,3 %, y ocupa la tercer posición en Bachilleratu, con un 62,8 %.
Nos ciclos formativos de grau cimeru de Formación Profesional, asítiase en cuartu llugar, con un 36,8 %.
Amás, el Principáu foi la tercer comunidá con mayor promoción d’alumnáu en 6.º de Primaria, con un 98,9 %, ente que en 4.º de Secundaria ocupó la sesta posición nacional, con un 89,7 %.
L’informe conclúi con una serie de propuestes de meyora n’aspeutos como les condiciones llaborales del profesoráu, l’atención a la diversidá ya inclusión, la orientación educativa o la descentralización de la ufierta formativa nos centros d’adultos y que delles de les midíes solicitaes nesti sentíu yá tán en marcha.
Coles mesmes, Espina anunció que’l resolvimientu que regula l’usu de dispositivos electrónicos nes aules a partir del próximu cursu escolar, que según afirmó va ser publicada a lo llargo del día de güei nel portal Educastur y nos próximos díes nel Boletín Oficial del Principáu d’Asturies (BOPA). Resolución
