- Fundación Oso Pardo/ Enllaz descarga: https://fundacionosopardo.org/…/libro-osas-el…/
Vídeu: FOP / 
Edición y soníu: Carlos d’Hita
Avanza la primavera y les oses paríes son les postreres en dexar les oseres. Aliméntense profusamente para compensar la gastadura de la envernía y de dar de mamar cada poques hores a los sos esbardos, que infatigables nun dexen de correr, engatar y engarrase.
Al tiempu asoceden los celos, y los grandes machos cortexen a les oses intercambiando afalagos y arrumacos, y arimándose de cutiu a los sos cuartos traseros, golifándolos para comprobar la so receptividá, y atinar col momentu de les cópules.
Los celos y los primeros paseos de les oses colos sos esbardos fora de les oseres asoceden en plena primavera cantábrica, qu’en guapura cromática colos sos espectaculares contrastes ente’l verde vivu de les fueyes nueves de fayedales y abeduriales, el mariellu de les flores de piornos y árgomes y l’intensu moráu de los gorbizales en flor, nada tien qu’envidiar a los paisaxes cantábricos serondiegos.
Puedes conocer detalles de los celos y la vida familiar de los osos cantábricos nel llibru “Oses. El comportamientu de les oses y les sos críes nel Cordal Cantábricu” editáu pola Fundación Biodiversidá y la Fundación Oso Pardo.
