El Principáu forma parte de la nueva Reserva Ecoturista de la España Verde, un gran corredor natural qu’impulsa esti tipu d’actividaes nel norte peninsular. Esta nueva ufierta ye la resultancia de venti meses de trabayu y un millón de fondos europeos d’inversión.
El Gobiernu d’Asturies presentó güei en Xixón la so aportación a la Reserva Ecoturista de la España Verde, un ambiciosu proyectu que xune a les comunidaes del norte peninsular para crear el mayor corredor d’ecoturismo d’Europa, con más de 300 empreses participantes y el respaldu del Ministeriu d’Industria y Turismu al traviés de los fondos europeos Next Generation.
Asturies apurre 38 esperiencies ecoturístiques desenvueltes por 83 empreses locales n’espacios naturales tan emblemáticos como los siete acutes de la biosfera de la comunidá o la ría de Villaviciosa. Estes propuestes inclúin dende’l avistamiento de fauna selvaxe hasta talleres d’ellaboración de sidra o quesos tradicionales, pasando por actividaes d’enoturismo, rutes empuestes por ecosistemes singulares o observación d’estrelles.
La viceconseyera de Turismu, Lara Martínez, destacó qu’esti proyectu “consolida’l lideralgu d’Asturies como destín natural, sostenible y auténticu, capaz d’ufiertar esperiencies tresformadores mientres tol añu”. Martínez recordó que’l Principáu lleva años trabayando xuntu col sector y otros territorios del norte para impulsar un turismu respetuosu cola redolada y coles comunidaes locales.
La Reserva Ecoturista de la España Verde ye frutu de venti meses de trabayu coordináu ente Asturies, Galicia, Cantabria y Euskadi, y enmárcase dientro del programa estatal Experiencia Turismo España, que financió’l proyectu con casi un millón.
L’oxetivu ye crear una ufierta común de turismu de naturaleza calidable, estructurada y sostenible, que ponga en valor la diversidá paisaxística, cultural y gastronómica de la cornisa cantábrica. Pa ello, trabayóse con empreses locales por aciu acciones de formación, certificación y creación de productu.
El proyectu va presentase oficialmente en Madrid el día 28 col llanzamientu d’una plataforma dixital pa la so promoción y comercialización, amás d’una campaña de comunicación que va incluyir material audiovisual como’l vídeu amosáu güei en primicia mientres l’actu.
Esta nueva ufierta allíniase cola estratexa d’Asturies como referente n’ecoturismo, que’l Gobiernu del Principáu impulsa dende la creación de la Mesa Asturiana d’Ecoturismo, onde collaboren l’Alministración autonómica, l’empresariáu y xestores de los espacios protexíos.
La España Verde, marca turística qu’arrexunta a les cuatro comunidaes del norte, quier asitiase nos mercaos internacionales como alternativa sostenible, curiosa y calidable, col respaldu de Turespaña. En total, los sos territorios axunten catorce reserves de la biosfera, 25 parques naturales, 2.000 kilómetros de mariña y abargana de 3.000 agospiamientos rurales.
