Cada vez ye más común ver esta especie d’aves na capital d’Asturies, a pesar de que ye una zona d’interior. Cuando una persona atópase cerca de la mariña nun se sospriende pola presencia de gaviluetes. Como estes aves suelen vivir próximes al mar, el fechu de veles analayando pola sablera o en cualquier puertu pesqueru nun llama nengún tipu d’atención. Sicasí, resulta un tanto estrañu columbrar estos animales llueñe de les zones marítimes. Por eso, nel momentu que tán presentes en ciudaes como Uviéu, que nun tienen mariña, los sos vecinos y visitantes nun tarden en preguntase qué faen ellí.
Nes últimes selmanes viéronse na capital d’Asturies delles pareyes d’esta especie conocida científicamente como Larus michahellis. Pero, nun ye la primer vegada qu’estes gaviluetes que se caractericen por tener les pates marielles derruempen el cielu y adéntrense n’Uviéu. Ello ye que la so presencia na ciudá ye cada vez más común, especialmente nel cascu antiguu. Nel centru urbanu podríamos inclusive dicir que formen parte del vecinderu porque se columbren con frecuencia.
¿Por qué Uviéu se convirtió tamién n’hábitat de les gaviluetes? El biólogu David Álvarez asegura que la presencia d’estes aves na capital asturiana ye por cuestiones de supervivencia. «Vienen a la ciudá en busca d’alimentu. Aprovéchense d’eses grandes cantidaes de comida que nós desperdiciamos», esplica’l profesor de la Universidá d’Uviéu. Nesti puntu, l’investigador señala que si non se despilfarrara tanta comida y «fuéramos más llimpios», probablemente, nun se produciría esta situación.
La gavilueta ye un animal con una dieta variada, capaz d’inxerir casi cualquier cosa. Dende materia vexetal y peces hasta pequenos mamíferos, crustáceos, moluscos o inclusive carroña. Les sos principales fontes d’alimentación son refugase acomuñaos a la pesca d’arrastre, colos que suel coincidir con frecuencia. Pero, ensin dala dulda, ye nos vertideros onde realmente llogra la mayor parte del so alimentu. Por eso frecuenter mientres tol añu y de forma repitida.
Delles gaviluetes nel puertu pesqueru de Cuideiru
Na ciudá tamién atopen comida, yá que como la mayoría de los cubos de basura nun tienen tapa pueden restolar y xurgar tranquilamente nes bolses hasta dar con restos aprovechables. Estes refugayes d’orixe humanu son los responsables de que cada vez haya más gaviluetes en redolaes urbanes, independientemente de si atópense próximos a la mariña o non. Si a esta oportunidá alimenticia súmase a la gran capacidá d’adaptación d’esta especie, resulta comprensible qu’estes aves tamién espolleten en zones del interior.
Nun debe por tantu estrañar qu’haya gaviluetes en ciudaes como Uviéu. Otramiente, la presencia d’esta especie tampoco tien d’esmolecer a los habitantes de la capital asturiana. Estes aves nun suponen «nengún tipu de peligru» para la sociedá. «Nun ataquen a la xente como se diz. Eso ye mentira. Una cosa ye que vaya a comer el bocáu d’un neñu y -y d’ensin querer un aletazu al neñu. Pero, nun va atacar directamente», asegura’l biólogu asturianu.
Les gaviluetes lo «únicu» que pueden faer ye provocar molesties na redolada. «Pue que xúbanse a les meses d’una terraza y tiren dellos vasos», apunta l’investigador, quien nun considera que’l soníu qu’emiten estos páxaros sía un problema significativu. Lo que pasa ye que tamos bien mal avezaos. «Hai xente que se fadia porque canten los páxaros pero nun-y importen les obres de la cai. Y eso ye porque cada vez tamos más separaos de la naturaleza», llamenta.
¿En peligru d’estinción?
Al so xuiciu, lo que realmente tendría d’esmolecer ye’l cayente d’esta especie. «La xente piensa que cada vez hai más gaviluetes pero nun ye asina. Nun hai tanta población como se cree. Ello ye que la población de gaviluetes patiamarillas, que ye la que tenemos equí, cayó en picáu, con un descensu cimeru al 80 per cientu nos últimos años. Nes colonies marines, que ye onde habita esta especie, y nos puertos pesqueros onde siempres se víen gaviluetes, cada vez hai menos», alerta.
Les Cíes pierden el 92 % de les sos gaviluetes en venti años.
Neses colonies naturales de gaviluetes, David Álvarez solía ver «cientos de pareyes», ente qu’agora solo columbra «cuatro o cinco». Nes Isles Cíes, por casu, había unes 6.000 pareyes y agora tienen de quedar 500 o 300», diz. Pero, ¿a qué debe esti descensu poblacional? «Son munches les razones. Dende la falta d’alimentu hasta’l cambéu climáticu. Hai tamién una enfermedá que les ta afectando bastante y ta produciendo mortalidaes bien grandes», esplica’l biólogu.
Ye, por tanto, «evidente» que les poblaciones naturales de gaviluetes tán menguando drásticamente: «tán cayendo en picáu». Lo que nun paez tan probable ye qu’esta especie empiece a faer presencia nes zones más rurales. «Eso nun lo sabemos, pero, si siguimos asina, n’unos años quiciabes yá nun veamos nenguna», alvierte’l profesor de la Universidá d’Uviéu.
