Güei ye un día mui importante pa les asturianes ya asturianos, un día como güei pero de 1.808 Asturies declara la guerra a la Francia napoleónica y la Xunta Xeneral declarase soberana, amás se toma como bandera la actual bandera asturiana.
- Mañana llunes vamos tener el cielu mui nuboso pela mañana con tendencia a dir abriéndose dellos claros pela tardiquina, asina y too en zones de montaña puen desendolcase les nubes a lu llargu’l día y dexanos dalguna gotera o xarabatín al atapecer con unes temperatures másimes que seguirán en descensu.
- A partir del martes camudu radical del tiempu, una masa d’aire cálidu dirá entrando pela península Ibérica pa dexanos un ascensu bultable de les temperatures anque a Asturies nun llegará hasta’l xueves, el martes y miércoles dirán esguilando les temperatures pero d’una manera más seliquina ya nel cielu tendremos escasa nubosidá.
- El vienres y sábadu sedrán los díes más calurosos con temperatures másimes que podrán algamar los 30ºC na mayor parte d’Asturies, sicasí ye probable que surdan nublines d’advención na costa por mor de la diferencia de temperatura ente la mar y la tierra, entovía la temperatura del agua ye baxa pola época na que mos atopamos, mentantu que la tierra se calez fondera y rápidamente col contautu d’estes mases d’aire.
- Yá de cara al sábadu y sobre too’l domingu’l calor va facer tamién que medren les nubes de desendolque y mos dexen xarabatos de calter tormentosu peles tardes.
