Cultura edita un álbum colos cantares ganadores del concursu escolar Al son del cantar, interpretaos por músicos asturianos.
- L’álbum incluye 12 canciones que l’alumnáu de llingua asturiana y eonaviegu compunxo pal concursu
- El CD va repartise a los centros escolares y va tar disponible en plataformes dixitales como Youtube y Spotify
- Los temes van presentase nuna gala en Corvera esta tarde que se va grabar y emitir depués en TPA
El concursu escolar Al son del cantar remata esti cursu cola edición pola Conseyería de Cultura, Política Llingüística y Deporte del CD Al son del cantar, vol II. Esti certame, basáu nun proyectu d’innovación educativa pal alumnáu de llingua asturiana y d’eonaviegu del últimu ciclu de Primaria y de 1.u y 2.u de Secundaria, afiánzase cola celebración de la so tercer edición esti añu.
Esta iniciativa entámenla les conseyeríes de Cultura, Política Llingüística y Deporte y d’Educación, y los Servicios de Normalización Llingüística, y trátase d’una propuesta de trabayu interdisciplinar, centrada nes árees de Llingua Asturiana o Eonaviegu y Música, pa fomentar la creatividá musical y lliteraria ente l’alumnáu cola mira de xenerar obres nueves de calidá.
Los cantares ganadores nel cursu 2024-2025 escoyéronse d’ente un total de 37 que se presentaron al concursu por parte de centros educativos de Cangas del Narcea, Ḷḷena, Castrillón, Carreño, Gozón, Nava, Grau, Villaviciosa y Cuaña. Depués, la organización del concursu contactó con profesionales de la música de tolos estilos, que reinterpretaron el tema infantil d’alcuerdu al so estilu particular.
El resultáu ye un CD de 12 canciones con soníos variaos que van dende’l pop indie al reggae, pasando pel rock y la música d’inspiración tradicional. Estos son los temes incluyíos:
- Colores, del CP Castillo de Gauzón (Castrillón), interpretáu pola cantautora Tania Pereira.
- As tradicióis, del CP Darío Freán Barreira (Cuaña), interpretáu pol conxuntu Tringuilintainas.
- El ramu del CRA Río Cibea, del CRA Río Cibea (Cangas del Narcea), interpretáu pol grupu de percusión tradicional y voz 6 Riales.
- La pita ḷḷueza, del CRA Lena (Ḷḷena), interpretáu pol grupu de punk-rock Ochobre.
- Yá llegan los aguilandeiros, del CP Virgen del Fresno (Grau), interpretado pol artista Ferla Megía.
- El profesor llocu, del CP Antón de Marirreguera (Carreño), interpretáu por Los Berrones.
- El cabu Peñes, del IES Cristo del Socorro (Gozón), interpretáu pol tríu folk Draque.
- Les cuatro estaciones, del CP San Bartolomé (Nava), interpretáu pol grupu de folk Cerezal.
- El patiu, del CP Les Mariñes (Villaviciosa), interpretáu pol grupu de rock experimental Melandru.
- Patios divertíos, del CP Vital Aza (Ḷḷena), interpretáu pola cantante y compositora Mapi Quintana.
- Xuntes, xuntos, del CP Jesús Neira (Ḷḷena), interpretáu pol cantante reggae Fred Warrior
- El manguán, del CP Antón de Marirreguera (Carreño), interpretado pol músicu de folk-rock Espantäyu.
El ramu al proyectu va ponese na gala de presentación del CD, que se va facer en Corvera esta tarde a les 16.30 hores, onde van participar ocho de los grupos musicales participantes y tamién l’alumnáu ganador de cada conceyu. La gala va grabala la Televisión del Principáu d’Asturies pa depués emitila.
Amás de la distribución del CD a centros educativos públicos d’Asturies, el so conteníu va tar disponible online al traviés de les plataformes Youtube, Spotify, Amazon Music, Tidal, Apple Music, Soundcloud, Deezer y iTunes, onde tamién tán disponibles los trabayos correspondientes a les ediciones anteriores del concursu: El mio cantar (2019) y Al son del cantar (2022).
