- https://www.turismoasturias.es/es/-/blogs/astroturismo-en-asturias-donde-ver-las-estrellas
- Autor: Ramón Molleda
Asturies: observatoriu estelar
Dende tiempos remotos aprendimos llecciones del firmamentu. N’especial la d’empobinanos o midir el pasu del tiempu. Nes enseñances náutiques siguen vixentes los principios del saléu astronómicu, y les recielles d’oveyes y cabres («reciella» n’asturianu) siempres precisaron de pastores qu’interpretaren bien los astros.
Anguaño, para mirar les estrelles pol prestar de faelo, precísense más que nunca zones llibres de lluz artificial y de mantos de contaminación. Y la orografía asturiana tamién la facilita, con cientos d’altos cumes y visos de mediu monte ensin interferencies llumíniques y con panorámiques de 360 graos.
Espacios naturales como los Picos d’Europa, o’l restu de los nuesos grandes parques: Redes, Somiedu, Ponga, Ubiñas-La Mesa o Fontes del Narcea, Degaña y Ibias, amás d’un bon puñáu de sierres protexíes y Reserves de la Biosfera, gocien d’una inmeyorable cayuela galáctica.
Y depués tán los valles alloñaos de les grandes poblaciones que regalen cielos igualmente escuros onde les estrelles riolen a los sos deleres. O numberoses árees del mariniegu aparentes para la observación de ciertos fenómenos, como la mesma aurora boreal, columbrada en delles ocasiones dende l’estremu más septentrional del Cabu Peñes y otros puntos de la rasa costera -Asturies rexistra esti espectáculu cuando l’actividá del sol ye especialmente intensa. La mariña tamién ye’l meyor anfiteatru para esfrutar de les Perseidas o «Llárimes de San Llorienzo» (agostu), les Gemínidas (avientu) o les Cuadrántidas (xineru).
Ayande va cuntar nun futuru próximu con un relevante observatoriu astronómicu. La guinda del pastel al so yá famosa Ruta de les Estrelles: itinerariu de seis kilómetros na redolada mesmu del Camín Primitivu de Santiago, ente los abelugos de la Foína y del puertu del Palu. Equí operen dende va tiempu empreses y colectivos qu’ufierten salíes nocherniegues ya interpretaciones de la cúpula celeste. Como «Ayande Stars», una iniciativa comandada por persones con titulación n’astrofísica.
Con Ayande Stars, ye posible contratar servicios d’observación empuesta per cielu nocherniegu o actividaes especiales dirixíes a centros educativos o empreses. Amás, na so web ufiértase información detallada sobro los eventos astronómicos qu’entama esti colectivu mientres tol añu.
Nesti 2025., destaquen trés cites:
- La sesta edición d’Ayande Stars. va celebrase del 22 al 24 d’agostu y ye el gran alcuentru astronómicu del conceyu d’Ayande. Una fin de selmana apinada de divulgación, talleres y observaciones.
- La segunda edición d’AstronoMieres que va tener llugar los díes 3 y 4 de mayu.
- La tercer edición de CosmoSomiedo los díes 27 y 28 de setiembre na espectacular redolada del Parque Natural de Somiedu.
Namá hai qu’evitar mirar directamente a la lluna -van dicinos los guíes- pa dir avezáu a vistir la escuridá. Adulces van dir apaeciendo énte nós les constelaciones más conocíes del hemisferiu norte: sietestrellu, Orión, Casiopea, Andrómeda…. pasaos unos minutos vamos tener la sensación de qu’éstes nun cesen de multiplicase. Los guíes van montar unos bonos telescopios y van ufiertanos esplicaciones detallaes sobro la nuesa galaxa, los furacos negros o la espansión del universu -que nun ye pocu.
Ayer Estelar ye otra esperiencia d’astroturismo n’Asturies, entamada pola empresa de turismu activu Jarascada. Na espectacular redolada del Altu de Cotu Bellu, un mirador natural de 360° a 1.200 metros d’altitú, realícense salíes astronómiques mientres el branu y la seronda. Espertos en divulgación astronómica y astrofotografía emponen esta actividá, enseñando técniques d’orientación nocherniega, como la localización del polu norte celeste, amás de munchos otros intereses sobro’l cosmos. Equí tienes más información sobro esta actividá.
Observatoriu Astronómicu Monte Deva y Planetariu en Xixón
Xixón alluga l’Observatoriu Astronómicu Monte Deva, que cada vienres abre les sos puertes al públicu para sesiones d’observación nocherniega, siempres que les condiciones sían favorables. Para garantizar una meyor visibilidá, nun se realicen actividaes en nueches de lluna llena, yá que el so rellumu enzanca la observación. Cada sesión céntrase nun eventu astronómicu concretu, como la oposición d’un planeta, el pasu d’un cometa o un eclís solar o llunar.
Para alcordar una visita hai que ponese en contactu cola Sociedá Astronómica Asturiana OMEGA, llamando al teléfonu de contactu 985 096 630 (los vienres de 20:00 a 22:00 hores). Tamién podemos comunicanos directamente cola dirección del observatoriu: 636 486 342. El día y hora de la visita va ser de común alcuerdu (preferiblemente los vienres). Hai que tener en cuenta qu’esta instalación ye atendida desinteresadamente por persones que nun tienen una dedicación esclusiva.
Tamién en Xixón, tres 20 años zarráu, reabrió les sos puertes tou un referente: el planetariu de la Escuela Superior de Marina Civil, agora forníu con un modernu proyeutor láser 4K. Un saltu del sistema analóxicu al dixital que dexa proyecciones del cielu nocherniego y diurno, aventures inmersives y viaxar pel espaciu ente asteroides y planetes, n’altu resolvimientu. Anque la so función principal va ser la formación n’astronomía náutica, la universidá estudia abrise a la ciudadanía con un programa de visites y actividaes divulgatives. Cuenta con una sala con capacidá pa 40 persones.
Observatoriu del Parque de la Vida en Valdés
A cinco minutos de la villa de L.luarca, na localidá d’El Matu, atoparemos col Parque de la Vida. Esti muséu abre les so puertes tolos díes (sacante llunes non festivos). Resulta imprescindible acutar primeramente llamando al: 689 570 708 o al 660 660 400.
Imaxe del Parque de la Vida (Valdés) ©Mampiris
Trátase d’un ampliu complexu espositivu inscritu nun espaciu natural con más de kilómetru y mediu de percorríu. En materia estelar destaca’l so observatoriu, la esposición temática sobro la lluna, l’interior real del cohete européu Ariane 5 o’l traxe espacial de la cosmonauta rusu Yuri Usachov. Traxe que vamos pasar munches ganes d’enfundarnos pa siguir la nuesa aventura espacial.
Asturies puede ser, ensin dulda, la to meyor danzadera a les estrelles.
