- Alborecemos con nubosidá estratificada, tando escampláu nes zones altes de la cordelera y fastera más surocidental con unes temperatures que tan alrodiu de los 15ºC, rexistrándose nel puirtu Payares 5,7ºC.
- Güei pali que pali van dir dixebrándose los estratos del alborecer nel llitoral onde quedará poco nuboso, mentantu na fastera central abriránse dellos claros o abancios nes hores centrales del día. Na cordelera y fastera más surocidental va tar poco nuboso o escampláu durante tol día como ye vezu n’estes situaciones anticiclóniques. Les temperatures van camudar poco y l’aire nordés tenderá a coyer puxu na costa y zones espuestes onde pue soplar cafiante ya moderadamente.
- Mañana llunes amenorgarán los estratos ya veremos más el sol con un ascensu moderáu de les temperatures másimes nel interior y sin cambios na costa por mor del vientu nordés que va soplar cafiante perellí, baxando la sensación térmica.
- El martes l’ascensu de les temperatures sedrá bultable anque menos de lo que veíen los modelos d’estos díes, asina y too algamaranse los 30ºC nel interior, muncho más llevaderu pel llitoral onde tendrán 23-24ºC con dalgo de nordés pero más seliquino que’l llunes. Amás la nubosidá de desendolque dirá medrando a partir del mediudía pa dexanos dalgún xarabatu de calter tormentosu, dispersu ya ocasional pela tarde.
