Hola, preséntome: soi José, anque yá poca xente llámame asina. Soi de Corvera d’Asturies y viví equí casi tola mio vida, salvu per dellos años que pasé fora. El mio contactu col graffiti empezó nel institutu, cuando empecé a rellacioname con persones venceyaes al movimientu, tantu directa como indirectamente. Tamién influyó enforma un viaxe a Barcelona, alredor del 92 o 93, que marcó un antes y un dempués na mio relación col graffiti, una pasión que m’acompaña hasta güei.
Les mios primeres esperiencies col esprái fueron autodidactes y empezaron ente 1994 y 1995. En 1996 participé nel primer concursu de graffiti que se celebró en Corvera. Entós daquella, el nivel n’Avilés yera bastante altu. Nun yera fácil atopar llugares onde pintar legalmente, y l’información arralecía —nun había Internet como agora—, pero siempres podíes averate a los túneles de Versalles o al skatepark pa ver trabayos nuevos.
Foi a finales de 1999 cuando, en roblando con dellos nomes (Speak, Rusk, Wouk), empecé a usar l’alies POCH. Yá nel 2000, xuntu a JHON, fundemos KSN (Kasi Ná), un grupu que marcó l’entamu d’una etapa más seria na mio trayectoria: viaxes a otres ciudaes, participación n’exhibiciones…
El graffiti empezó a consolidase como una forma de vida pa mi. Tolo que m’arrodiaba xiraba en redol a ello. Homenaxe a Picasso del artista Poch con esti mural nel Festival d’Arte Contra l’Olvidu, en La Torre del Valle (Zamora)
En dellos viaxes a Ponferrada conocimos a otros escritores d’esa ciudá, y terminamos formando parte del so grupu, AGLC (antes AGL), creáu en 1998. Integré a mediaos de los 2000 y sigo perteneciendo a él a día de güei. Tamién formo parte de KW, otru grupu compuestu por siete escritores asturianos.
Colos años, pasé de pintar solo pa mi a faelo tamién pa los demás. Esta pasión yá forma parte de mi, ye daqué que tengo presente casi a diariu. Eso sí, col tiempu dexé de llau la parte illegal del graffiti, buscando llugares onde pueda espresame con aselu, ensin problemes. Agora prefiero pintar n’espacios abandonaos o sitios onde se cunte con permisu. Dalgunos dicen que si nun ye illegal nun ye graffiti, caúnu ye llibre de pensar lo que quiera… Pintu pa mi, lo que me gusta y ensin etiquetes.
Anguaño, y afortunadamente, dedico profesionalmente a esto. Pintu por encargu pa quien confíen en mi y llegamos a un alcuerdu. Anque l’arte urbano ta en puxanza, inda hai quien nun lo valora, pero siéntome estimosu por toles oportunidaes que me brindaron: pinté en colexos, institutos, pa conceyos, empreses y particulares.
Arte urbano del artista asturianu Poch na puerta d’unos garaxes d’una comunidá de vecinos de Xixón.
Nos últimos meses trabayé, ente otros, en Burgos y Vigo pintando en colexos, tamién en coles n’Asturies, en Xixón decorando puertes de garaxe, y tamién fixi trabayos n’habitaciones onde me pidieron el nome de los neños. Dacuando paro a pensar que les mios lletres —el mio estilu— tán n’espacios onde neños y neñes venlo a diariu y crecen con elles.
Anguaño fui nomáu al meyor mural del mes de mayu pola plataforma Street Art Cities, y dempués de casi 30 años desque coyí per primer vegada un esprái, qu’el to nome suene a nivel internacional… empresta.
Nominación a «Meyor mural del mundu», pintada pol artista Poch,
nel mes de mayu pola plataforma artística Street Art Cities
Agora mesmu toi trabayando en nuevos proyectos y otros que yá tán en marcha, como pintar dellos murios nel conceyu de Corvera, onde dellos vecinos venciéronme los sos espacios. Tamién tengo pindiu participar en dellos festivales esti branu. Llueu voi tar na Metrópoli, dientro de la convención de tattoo que se celebra la última fin de selmana de xunu en Xixón. Tamién tengo un cole n’El Bierzo y dalgunu más per Asturies. Amás, tengo más proyectos con particulares, asociaciones y empreses en fase de preparación y negociación.
Si daquién ta interesáu en contactar conmigo, el mio corréu ye thapoch@gmail.com y podéis atopame nes redes sociales como @poch_1 n’Instagram, y na páxina principal tamién vais atopar l’enllaz a dos cuntes más nes qu’enseño delles coses más de les que faigo, y en Facebook como @peoceache.
Poch, artista asturianu / Semeya: Marieta
