Tres la calorosa xornada d’esti vienres na que se llegó a algamar n’Asturies los 37 ºC (concretamente nos conceyos de L.lena y Amieva), esti sábadu vamos tener un cambéu térmicu total cuidao que van baxar les máximes de forma xeneralizada y notable. Amás, va predominar la nubosidad en tola rexón. Con éses vamos amanecer con cielos bien nublos o cubiertos y con posibilidá de que pueda escapase dalgún orbayu pocu importante pela mañana. A lo llargo de la tarde, van abrise escamplaes nel occidente y nun se refuga en zones de la metá norte asturiana antes de la nueche. Los vientos van ser fluexos predominando de norte. Les temperatures, como dicíamos, van esperimentar un importante descensu especialmente nel casu de les máximes cuidao que, en comparanza col vienres, van baxar hasta 9 o 10 ºC en tol interior. Na mariña, el descensu tamién va ser bien significativu anque non tan acentuáu. Poro, vamos pasar de superar en demasía los 30 ºC, a rondar los 20 ºC en munches poblaciones asturianes. Les mínimes van baxar nel sur y van caltenese nel restu. El domingu les temperatures máximes van xubir un par de graos polo que, igualmente, van quedar bien llueñe de les rexistraes estos díes tras.
