Va ser el día más calorosu de la selmana. Les máximes van xubir hasta 8 ºC más que les anotaes el llunes. Namá nel cordal y otros puntos del terciu asturianu van ser les zones onde apenes van variar los termómetros respecto al día anterior. Con éses van superase con facilidá los 30 ºC en munches poblaciones asturianes. Les mínimes pela so parte, tamién van xubir anque de forma más moderada. Pero, per otru llau, el martes va ser un día nel que la inestabilidá va cobrar protagonismu sobremanera na recta final. Pela mañana nun va llover anque van predominar intervalos de nubes medies y altes. Conforme avance la tarde la probabilidá de bastios va dir n’aumentu. Nun van ser xeneralizaos, pero localmente van afectar a dellos puntos de la rexón pudiendo descargar con fuerza.
Ello ye que l’Axencia Estatal de Meteoroloxía va activar a partir de les 15:00 hores l’avisu mariellu en tola Comunidá Autónoma por fuertes bastios d’hasta 15 llitros per metro cuadráu nuna hora, por nubes de xarazo y por fuertes raches de vientu acomuñaes a diches nubes. Esti avisu tamién va tener llugar mientres la madrugada del miércoles momentu nel que la inestabilidá afecte a una mayor cantidá de localidaes asturianes según los modelos meteorolóxicos.
