Otros seis artistes mozos fueron premiaos con 1.000 euros y van participar na 35ª Amuesa d’Artes Plástiques del Principáu d’Asturies. Actualidá Asturies
L’artista Raquel Lobo foi galardonada col Premiu Asturies Nuevu d’Artes Plástiques 2025, na so 35ª edición. El xuráu reconoció’l valor artístico y conceptual de la so serie de seis tapices de gran formatu titulada Debaxo de too. El premiu, convocáu pola Dirección Xeneral de Mocedá del Principáu d’Asturies, ta dotáu con 6.000 euros ya inclúi la oportunidá de realizar una esposición individual en Salar Borrón mientres 2026.
Amás de la ganadora, el xuráu escoyó a otros seis nuevos artistes que les sos obres van formar parte de la 35ª Amuesa d’Artes Plástiques del Principáu d’Asturies. Cada unu d’ellos va recibir una dotación económica de 1.000 euros. Los artistes escoyíos son: Andrea Álvarez Fernández, Alejandro Fuertes Sánchez, Jonás San Miguel Pilarte, Elis Mariel Suero Florentino, Irene Trapote Carpinteru y Aida Valdés Gómez. L’Amuesa, consolidada como una de les principales plataformes de promoción del arte nuevo n’Asturies, va ufiertar a estos siete creadores la posibilidá d’esibir el so trabayu n’una esposición colectiva, sofitada institucionalmente pol Principáu.
El xuráu tuvo presidíu pol director xeneral de Mocedá, Francisco d’Asís, y compuestu por destacaes figures del ámbitu artísticu. El procesu de selección valoró especialmente la orixinalidá, l’enfoque creativo y conceptual, la pertinencia de la reflexón artística y la contextualización territorial de les propuestes.
Según Fernández Olanda, estos premios busquen ser un estímulu para sofitar “tol talentu” de la mocedá asturiana y fomentar la creación artística emerxente na rexón.
