Mediu Rural algama un récord de 91 millones abonaos na campaña de 2024 de la PAC, 3,2 más que va un añu. Los llabradores y ganaderos recibieron casi 70 millones antes de rematar el pasáu exerciciu. L’Executivu fai un balance bien positivu d’esti programa européu que supon un impulsu pal sector.
La Conseyería de Mediu Rural y Política Agraria abonó 91.098.226 euros de les ayudes de la Política Agrícola Común (PAC) de la campaña de 2024 mientres el periodu ordinariu de pagu, que remata güei. Trátase d’una cifra récord, qu’amonta en 3,2 millones la cuantía paga al zarru de xunu del añu pasáu. Amás, los llabradores y ganaderos recibieron casi 70 millones antes de rematar 2024.
- El mayor importe, más de 66 millones, correspuende a les ayudes directes, lo que supon 3,8 millones más que l’añu pasáu.
- El segundu bloque de mayor cuantía ta amestáu a les ayudes acomuñaes a la producción, con más de 23,8 millones, una llínea que na campaña anterior sumó 23,5 y que pivota sobre’l vacunu estensivu: más de 11,6 millones pa vaques nodrizas, con un complementu por races autóctones per segundu añu consecutivu, y más de 11,4 millones pal vacunu de lleche.
El balance de l’ayuda complementaria pa nuevos llabradores supera los 2,7 millones. L’añu pasáu, la cantidá abonada nestes feches xubía a 2,3 millones, y en 2022, a un millón, una evolución que demuestra’l sofitu a la mocedá, con especial atención a l’actividá desenvuelta por muyeres.
D’esta miente, l’importe total de pagos de les ayudes directes de la PAC de 2024 realizaos nel periodu ordinariu supera’l balance de la campaña anterior. Amás, la cantidá final entá podría amontase si una vegada liquidaes estes ayudes a nivel nacional esistieren remanentes de l’ayuda básica a la renta ente toles comunidaes. Si diera esa situación, habría un nuevu abonu n’ochobre, xuntu colos espedientes que tean en revisión.
Ayudes de desenvolvimientu rural
- Tocantes a les ayudes al desenvolvimientu rural, güei pagarense 970.314 euros correspondientes a distintes llínees -monte, ganadería ecolóxica y Rede Natura-, lo que refundia un importe total de más de 25 millones.
- A l’ayuda de monte, dirixida a zones con llimitaciones naturales o otres específiques, destináronse más de 18,4 millones.
- Coles mesmes, la producción ecolóxica superó na campaña de 2024 los 2,9 millones y los productores de races autóctones recibieron casi dos.
- Finalmente, los 1,7 millones restantes distribuyirense ente les ayudes a la Rede Natura 2000 y a la biodiversidá (apicultura y pumar).
