Cultura impulsa la modernización de Valgrande Payares con una inversión de 750.000 euros. La conseyera de Cultura, Política Llingüística y Deporte, Vanessa Gutiérrez, anunció esti sábadu una inversión de 750.000 euros na Estación Iverniza y de Monte Valgrande-Payares para favorecer la desestacionalización y atraer visitantes al equipamientu l.lenizu mientres tol añu, que los sos primeros trabayos van empezar a finales d’esti exerciciu.
Valgrande-Payares, dende la so apertura fai yá más de setenta años, foi «motor de desenvolvimientu» para’l territoriu, señala l’Executivu n’una nota, na que considera «prioritaria» la so adecuación por que pueda ser esfrutada en periodu branizu cola práctica de too tipu d’actividaes al campu, amás de siguir siendo una estación referencial para practicar deportes d’iviernu.
La titular de Cultura esplicó que con esti oxetivu ellaboró un «ambiciosu» plan d’actuaciones qu’empezó con una inversión cercana a los diez millones na telecabina, inaugurada a finales de 2022, y que sigue agora coles primeres actuaciones de la segunda fase.
Publicidá
Eses intervenciones van implicar un gastu de 750.000 euros para ampliar la ufierta de la estación, modernizala y convertila nun exemplu de diversificación y desenvolvimientu sostenible.
«Una amuesa del convencimientu y el compromisu con un futuru que s’escribe con palabres qu’esti gobiernu siempres traduz fechos», apuntó la conseyera.
Ente les principales actuaciones previstes inclúyense les sifuientes:
- El diseñu d’un bikepark integráu na redolada natural.
- L’adecuación y meyora d’accesos pa facilitar la llegada de toles persones.
- La renaturalización de zones verdes y recuperación paisaxística.
- El refuerzu de la rede de senderos y pistes pa bicicleta de monte.
- La creación de rutes accesibles y nuevos miradores panorámicos.
- El diseñu y creación d’una pista d’esquí de fondu que va ampliar les posibilidaes deportives de la estación.
Esta inversión va dexar desenvolver un paquete de proyectos clave para modernizar la estación y diversificar la so ufierta más allá de la temporada de nieve, con meyores n’infraestructures, accesibilidá y programación d’actividaes para faer del equipamientu un destín curiosu en cualquier dómina del añu.
Ente les principales actuaciones previstes inclúyense’l diseñu d’un bikepark integráu na redolada natural; l’adecuación y meyora d’accesos pa facilitar la llegada de toles persones; la renaturalización de zones verdes y recuperación paisaxística; y el refuerzu de la rede de senderos y pistes pa bicicleta de monte.
Amás, preve la creación de rutes accesibles y nuevos miradores panorámicos; y el diseñu y creación d’una pista d’esquí de fondu que va ampliar les posibilidaes deportives de la estación.
Parte d’estes actuaciones van empezar yá esta seronda, respetando l’actividá braniza y la temporada de nieve, y l’execución va completarase en 2026.
La visita de la conseyera coincidió cola celebración del primer Festival de Monte nel complexu l.lenizu, un eventu qu’aúna cultura, naturaleza y actividá deportiva nuna redolada d’altu monte, y que s’enmarca na estratexa de reactivación braniza del equipamientu y de la programación ‘Veranu en Payares’.
La Cámara de Comerciu d’Uviéu sorrayó esti sábadu que l’apueste del Principáu pola desestacionalización de la Estación Iverniza y de Monte Valgrande-Payares, incorporando nuevos usos turísticos, deportivos y naturales mientres el periodu branizu, constitúi xuna estratexa «acertada» y alliniada colos retos de diversificación económica y cohesión territorial qu’encara Asturies.
La entidá cameral espresó asina’l so respaldu firme y decidío» al anunciu realizáu güei pola conseyera en relación cola segunda fase del procesu de tresformamientu del equipamientu.
La inversión anunciada, dotada con 750.000 euros, «non solo demuestra un compromisu sosteníu» del Gobiernu autonómicu cola modernización de la estación, sinón que «define con claridá un nuevu horizonte» pa Payares, abondó’l presidente la Cámara, Carlos Paniceres.
Nesti sentíu, consideró que la creación d’un bikepark, la meyora de senderos y pistes BTT, la renaturalización de la redolada, l’adecuación d’accesos o la instalación de miradores y senderos accesibles son actuaciones que refuercen el potencial turístico y deportivo del conceyu de L.lena y del conxuntu de la área central asturiana.
La Cámara de Comerciu d’Uviéu valora «especialmente» qu’esti procesu plantegase dende una visión integral, respetando la convivencia ente la temporada de nieve y les nueves actividaes branices, y apostando por una execución biañal que dexe «planiar con rigor y perspectiva» de futuru.
