La conseyería impulsa esta iniciativa pa consolidar una programación escénica estable y de calidá en tol territoriu. La Conseyería de Cultura, Política Llingüística y Deporte abrió’l periodu de consulta pública previa del decretu que va regular la Rede de Teatros del Principáu d’Asturies, una ferramienta nueva de coordinación de los equipamientos escénicos que cunten con una programación estable n’artes escéniques y musicales.
La futura Rede de Teatros naz cola mira de fortalecer les polítiques culturales del Principáu, optimizar recursos, racionalizar proyectos yá existentes y garantizar una ufierta cultural de calidá, diversa y accesible en tol territoriu asturianu. Esta norma va regular la composición de la rede, organización, competencies y funcionamientu, consolidando un sistema d’apoyu institucional al sector de les artes escéniques.
Esta consulta busca conocer la opinión de la ciudadanía y de les entidaes vinculaes potencialmente a les industries culturales, primero d’aprobar el borrador normativu y en cumplimientu de les directrices del Conseyu de Gobiernu pa la participación ciudadana nel procedimientu d’ellaboración normativa.
El periodu d’aportaciones empezó’l día 10 de xunetu y va tar abiertu hasta’l 24 de xunetu del 2025. Les propuestes van poder mandase al corréu electrónicu participa@asturias.org. Más información en: https://acortar.link/D1wdta
