Greenpeace presentó un informe sobro la mariña del norte d’España. La organización denuncia que la xestión de la mariña y el cambéu climáticu podría tener graves consecuencies na mariña asturiana. Nel mapa d’Asturies, Greenpeace marca los llugares con riesgu d’inundación pol aumentu de la temperatura y l’aumentu, amás, del nivel del mar n’hasta 24 cm.
A eso sumen otros puntos de riesgu, marcaos en mariellu, tres en Xixón y unu en Llanes, riegos pol urbanismu, por edificar a pie de mariña o pola masificación de turismu.
Per un llau hai que combatir el cambéu climáticu, el gas d’efectu ivernaderu, que con un amenorgamientu moderáu de les emisiones podría evitase’l 40% del retrocesu de les sableres de tol mundu.
Alvierten de riesgu d’inundación nes ríes del Eo, el Nalón o’l Seya, siendo los conceyos más afectaos pol aumentu del nivel del mar los de Castropol y Villaviciosa, sufriendo consecuencies nes sableres.
Según Greenpeace, n’Asturies hai cuasi 30.000 viviendes turístiques, namás en Xixón hai más qu’en Palma. Denuncien l’impactu d’actividaes de turismu d’aventura masificaes como’l descensu del Seya.
Otru datu qu’ufierta l’informe ye que s’espera que la temperatura media del mar creza un grau y mediu. En xunetu del añu pasáu llegóse a una temperatura del agua récord: 24,7 graos n’El Musel, en Xixón.
