El turismu rural marca nel Principáu’l so meyor xunu de la hestoria, con más de 85.000 pernoctaciones. La comunidá algama cifres récord de visitantes para’l sestu mes del añu. La llegada de viaxeros internacionales sigue a l’alza en creciendo un 2%. “Los datos reflexen l’ésitu de la estratexa de desestacionalización y consoliden Asturies como referente en turismu sostenible y calidable”, sorraya Lara Martínez. Info: Actualidá Asturies
Asturies sigue consolidándose como destín turísticu de referencia. Los datos publicaos güei pol Institutu Nacional d’Estadística (INE) confirmen que’l turismu rural algamó en xunu les sos meyores cifres históriques para esti mes: 32.318 persones agospiárense n’establecimientos rurales y xeneraron un total de 85.749 pernoctaciones. Esto supon una crecedera interañal del 10,5% en númberu de turistes y del 24,5% n’estancies al respective de xunu de 2024.
Esti escelente comportamientu contribuyó a que’l conxuntu de l’actividá turística nel Principáu rexistrara tamién cifres bien positives: 298.442 turistes y 633.630 pernoctaciones, lo que representa medríes del 4,6% y 2,4%, respectivamente. Son los meyores datos de visitantes para un mes de xunu desque hai rexistros y el segundu meyor datu d’estancies, namá por detrás de 2023.
La crecedera de visitantes foi xeneralizáu en casi toles tipoloxíes d’agospiamientu. Sacante los albergues turísticos, tolos establecimientos amuesen medríes significatives: los apartamentos turísticos lideren la crecedera (131,5%), siguíos de los campings (29,4%), el turismu rural (10,5%) y los hoteles (1,9%). Toos hoteles (204.806 turistes), campings (34.335), apartamentos turísticos (16.184) y agospiamientos rurales (32.318)– batieron el so récord de visitantes nun mes de xunu.
Tamién el turismu internacional amosó esta crecedera, con un total de 83.309 viaxeros estranxeros, un 2% más qu’en xunu de 2024. La medría foi especialmente notable n’apartamentos turísticos (179,9%), hoteles (18%) y agospiamientos rurales (12,7).
Los indicadores económicos tamién confirmen la bona evolución del sector. La tarifa media diaria n’hoteles algamó los 73,14 euros (9%) y l’ingresu mediu per habitación disponible asitiase en 40,12 euros (8%), dambos en comparanza con xunu de 2024.
A lo último, l’empléu n’agospiamientos turísticos sigue a l’alza. En xunu, el sector dio trabayu a 6.371 persones, lo que supon un 1,5% más que nel mesmu mes del añu anterior y un aumentu del 9,2% al respective de mayu.
La viceconseyera de Turismu, Lara Martínez, valoró estos datos como “una amuesa clara de que la estratexa turística del Gobiernu d’Asturies ta dando resultancies”. “La crecedera del turismu rural y el fechu de que teamos batiendo récords nun mes como xunu demuestren que tamos llogrando unu de los nuesos grandes oxetivos: allargar la temporada más allá del branu, desestacionalizando la demanda y xenerando actividá económica y empléu de forma más sostenida nel tiempu”, señaló.
“La fortaleza del turismu rural confirma qu’Asturies ye un referente pa quien busquen naturaleza, autenticidá y calidá, y anímanos a siguir apostando por un modelu turísticu sostenible, que curie del territoriu y que beneficie a tolos conceyos del Principáu”, concluyó.
