Una fueya de ruta para garantizar redolaes, servicios y productos afechos para toles persones. El documentu recueye les actuaciones clave para los próximos 5 años coles mires d’esaniciar barreres qu’afecten especialmente a persones mayores y con discapacidá. La estratexa articúlase en 5 exes: (1) Transversalidad, (2) Comunicación y sistemes de sofitu, (3) Urbanismu, edificación y vivienda (4) Cultura, ociu y deporte, (5) Tresporte. Un apueste decidíu por una Asturies accesible, inclusiva y para toles persones.
Marta del Arcu, conseyera: “Esti testu representa’l compromisu firme del Gobiernu d’Asturies con una sociedá más inclusiva y más xusta”.
La estratexa s’estructura en cinco exes fundamentales, cada unu de los cualos recueye acciones concretes para esaniciar barreres arquitectóniques, sensoriales, cognitives, orgániques, sociales y físiques:
- Transversalidad. Los retos d’accesibilidá tienen d’encetase de forma integral y coordinada para garantizar la participación plena de toles persones.
- Comunicación, señalización y sistemes de sofitu. Esti apartáu resulta esencial para favorecer la participación social de la población. Abarca dende la fayadiza señalización d’espacios y edificios públicos hasta l’atención afecha nes alministraciones y l’accesu fayadizu a les nueves tecnoloxíes.
- Urbanismu, edificación y vivienda. Les ciudaes tienen de convertise n’espacios ensin barreres. Tamién resulta precisu avanzar por que toes les viviendes sían accesibles.
- Cultura, ociu y deporte. Estos sectores, qu’arriquecen la vida de les persones, tamién tienen de ser inclusivos.
- Tresporte. Nesti campu ye precisu esaniciar delles barreres qu’inda persisten.
L’avieyamientu de la población asturiana, xuntu con una alta prevalencia de la discapacidá, plantega desafíos significativos de servicios y polítiques públiques para los próximos años, especialmente n’accesibilidá y atención social. La estratexa presentada esta mañana pretende empobinar les acciones para faer frente a esos retos.
