Esperamos, en llínees xenerales, un día veraniegu. Los cielos van tar pocu nublos anque, si hai una zona na qu’haya una probabilidá daqué más alta de ver nubes, esta va ser la mariña. En tol interior vamos tar falando de cielos prácticamente estenaos sobremanera nes hores centrales del día. Pero na mariña nun se refuguen dellos intervalos nublos que, comoquier, nun van dexar precipitaciones. Los vientos van predominar de nordeste fluexos con delles raches moderaes na mariña. Les temperatures mínimes van xubir y les máximes van ser similares a les del vienres o, sía que non, llixeramente un pocu más baxes.
El domingu va ser el día más calorosu de la selmana. Los cielos van tar estenaos en tol Principáu d’Asturies (incluyida nesti casu la mariña) y les temperatures van xubir de forma notable y xeneralizada. Concretamente, les máximes van xubir hasta 7 o 8 ºC más que’l sábadu (na mariña l’ascensu va ser más moderáu). Poro, espérense máximes que van superar claramente los 30 ºC en tol interior y con posibilidá de devasar los 35 ºC nes zones más templaes del Principáu. Ello ye que l’Axencia Estatal de Meteoroloxía tien previstu activar l’avisu mariellu nel suroccidente asturianu por altes temperatures que van superar los 34 ºC.
El llunes y el martes van ser otres dos xornaes bien caloroses que podríen, anque sía por pocu, superar a la del domingu.
