Fragmentos del vídeu publicáu pola páxina oficial d’Instagrade «Los Xuegos de la Fame»
Un vídeu publicáu na cuenta oficial de la saga de películes amuesa impresionantes vistes del Parque Natural de Somiedu y revela detalles de la nueva cinta, que se va estrenar el 20 de payares de 2026. La cuenta oficial de «Los Xuegos de la Fame» n’Instagram publicó va unos díes un vídeu que revela nueves imaxes del rodaxe de «Amanecer na Collecha», precuela de la saga creada por Suzanne Collins, que se filma esti branu nel Parque Natural de Somiedu y en Teberga.
El clip amuesa pimpanes vistes del Parque Natural de Somiedu y una de les secuencies más llamatives amuesa al actor protagonista, Joseph Zada, saliendo del so camarín, que lleva na puerta una placa col nome del so personaxe, «Haymitch», vistiendo una camiseta negra estampada con dos osos y la palabra «Somiedu», un chisgo directu a la fauna y al llugar onde se desenvuelve’l rodaxe.
El metraxe tamién amuesa parte del equipu técnicu n’acción, con cámares y otros dispositivos de grabación captando secuencies en plena naturaleza. Estes imaxes sumanse a les filtraciones anteriores de *ans, nes que podíen apreciase estructures como pasareles, plataformes circulares y la icónica Cornucopia integraes nel paisaxe.
El vídeu conclúi con un mensaxe que confirma que la película sigue «en producción» y que’l so estrenu mundial ta previstu para’l día 20 de payares de 2026, xenerando entá más espectación ente los siguidores de la saga.
Amás del impactu visual que va suponer ver en pantalla estes paraxes asturianes, nos conceyos implicaos prevese una importante torna económica mientres les selmanes de grabación. L’equipu va traer a decenes de persones —ente técnicos, actores y personal auxiliar— que se va instalar xuna zona loxística con dellos camiones na redoma de San Martín, en Teberga. En paralelu, la llegada del rodaxe tamién va sirvir p’acometer ciertes meyores en caminos d’accesu a les localizaciones, con arreglu inclusive de dalgunos desperfectos al cargu de la producción.
L’equipu de producción ta actuando «con muncha prudencia» pa embrivir les molesties y consiguir que la población local «tea cómoda» mientres el rodaxe. Tamién se busca que la esperiencia, más allá del impactu inmediatu, sirva como escaparate natural p’atraer futuros visitantes, destacando «los atributos del monte, les agües y el valor paisaxísticu» de Teberga y Somiedu.
