El gurú asturianu de la meteoroloxía que nunca falla (siquier, dica agora): recurren a él para grabar series y pelis famoses. Participó nun centenar de películes y anuncios de televisión como asesor meteorolóxicu: «De primeres fízolo por hobbie».
Jaime Villanueva, de llombu, mientres una visita a los llagos de Somiedu. | LNE
Los productores saben bien a quién tienen que recurrir pa planiar un rodaxe ensin riesgu a vese sotripaos pola agua. L’uvieín Jaime Villanueva ye inxenieru informáticu, pero dende bien nuevu apasionó-y el mundu de la meteoroloxía. La so habilidá para faer predicciones combinando datos de vientu, mugor y otros parámetros cola orografía de llugares concretos valiéron-y para ganase la fama d’infalible nel mundu del cine. «De primeres fícelo por hobbie, pero agora yá lo faigo como trabayador autónomu», esplica esti vecín que vive cola so muyer y los sos fíos xuntu al Reconquista».
Empezó dando conseyos de manera informal para pequenes producciones. Sicasí, como siempres atinaba, los productores empezaron a correr la voz de que nunca fallaba y empezaron a llove-y les ufiertes. «La primer vegada que fixi xuna collaboración de manera profesional foi va cuatro años nun trabayu en Galicia», remembra esti especialista n’antemanase a los movimientos de les nubes, que yá atropa «abargana d’un centenar» de participaciones en películes y anuncios publicitarios. «La mio muyer Carmen y un amigu, David, animáronme a poneme d’autónomu. Yo nun me decidía, porque siempres me dio un pocu de vértigu los gastos que trai entamar», rellata.
Los sos servicios fueron contrataos para la grabación de la serie «Infiesto» de la plataforma Netflix. Tamién apurrió les sos predicciones a la productora Surfilm sobre dalgunes localizaciones baraxaes para rodar «Los 4 Fantásticos» que dempués fueron refugaes al decantase l’equipu por centralizar toles escenes nel Calatrava. Tamién guarda especial alcordanza de la so participación na segunda parte de «La caza» y «Cles». «Eses series enllenáronme enforma», almite.
Anuncios d’empreses importantes. Tamién atropa bien de trabayos publicitarios. A él recurren davezu los creadores de los anuncios de la Central Llechera Asturiana, McDonald’s o la empresa de publicidá que lleva a Messi. «Esto últimu faime especial ilusión», repostia Villanueva, bien futboleru y «como nun podía ser d’otra manera» sociu del Uviéu.
Les producciones nes que participa rodárense en gran midida fora d’Asturies. Galicia, País Vascu y Cataluña tán entre los sitios d’onde suel recibir más encargos, anque’l destín llevólu yá a participar en trabayos rodaos n’Arizona (Estaos Xuníos o Ucrania.
Cuando la cercanía y el tiempu lu dexen allégase a los llugares escoyíos para los rodaxes para faer un analís más refechu de les condiciones meteorolóxiques. Sicasí, ye habitual que realice’l so trabayu en remotu, utilizando toles ferramientes informátiques al so algame para garantizar una efectividá máxima nes sos predicciones. «Ta mal que yo lo diga, pero hasta la fecha nun tuvi nengún fallu», sostien.
Considera que detrás de tantos encargos ta «la boca a boca», pero tamién el fechu d’ufiertar un serviciu de 24 hores. «Cuando hai rodaxes pela nueche o n’otres partes del mundu llevanto igual a les trés o les cuatro de la mañana para siguir la evolución y afinar al máximu la predicción», esplica.
Según esplica, nos sos informes detalla aspeutos como les condiciones del vientu, la nubosidá, la cantidá d’agua cayida o la dirección del vientu. A ello añede les peculiaridaes de cada zona. «Por casu, n’Uviéu dacuando l’Aramo fai l’efectu d’una aleta de windsurf y echa les nubes para otru llau», detalla en relación con un trabayu que, a la so manera de ver, rique d’una gran cualidá: tener muncha paciencia.
Villanueva considera qu’Asturies tien d’aprovechar la oportunidá d’entrar nel circuitu de destinos predilectos para la realización de rodaxes. «Nel País Vascu rueden bien de porque apuesten por ello y tienen beneficios fiscales, pero esta actividá dexa bien de dineru», destaca esti profesional, que tamién inclúi nel so catálogu de servicio predicciones meteorolóxiques para bodes y la celebración d’otros grandes eventos. «Nunca pensé que viviría d’esto, pero ye un serviciu únicu», conclúi Villanueva.
