La llanisca Carmen Rodríguez Villar, galardonada nel International High School Arts Festival celebráu en Tokio. La so obra va esibise nel National Art Center de Tokyo ente’l 6 y el 17 d’agostu al pie de otres pieces premiaes.
La moza artista llanisca Carmen Rodríguez Villar, qu’acaba de completar los sos estudios de bachilleratu artísticu na Escuela d’Arte d’Uviéu, recibió esti miércoles en Tokio un premiu nel International High School Arts Festival (IHSAF) 2025, un certame d’artes plástiques entamáu pola International Foundation for Arts and Culture (IFAC).
La llanisca foi escoyida como ganadora del concursu de la IHSAF n’España cola obra titulada «Odontoglossum alexandrae», y allegóse a Xapón a recoyer el premiu como representante del nuesu país. La ceremonia d’entrega d’estos premios internacionales pa mozos artistes, qu’algamó en 2025 el so 26ª edición, celebróse nel Ritz-Carlton Tokyo.
L’artista llanisca que s’alzó col galardón n’España participó nesti certame, destináu a mozos menores d’edá, a iniciativa del profesor Job Sánchez Julián, del Departamentu d’Estensión Cultural y Promoción Artística de la Escuela d’Arte d’Uviéu, xuntu con otros cuatro alumnos del centru, propuestos polos sos respectivos profesores de dibuxu.
Más allá de la entrega de galardones del certame, la programación pa los artistes galardonaos inclúi xuna visita al National Art Center de Tokyo, onde les obres premiaes van quedar espuestes ente’l 6 y el 17 d’agostu, y una xornada d’intercambiu cultural con participantes xaponeses nel certame, informa Europa Press.
