LNE / Ilustración d’un horru asturianu con una imaxe urbana de Bonos Aires
El consuláu español na capital arxentina recibe nada menos que 553.293 solicitúes de nacionalización pola «Llei de nietos» y la mayoría correspuenden a descendientes de gallegos y asturianos. A la fin del procesu abiertu pol Gobiernu d’España, envalórase que Bonos Aires sía, dempués de Madrid y Barcelona la tercer ciudá del mundu con más españoles rexistraos oficialmente.
¿Daquién imaxínase que la ciudá más poblada d’Asturies fora, en realidá, Bonos Aires? El supuestu (que na capital arxentina haya más más asturianos que n’Uviéu o en Xixón) nun ye del tou delirante a tenor del númberu de pidimientos de nacionalización que ta rexistrando’l Consuláu d’España n’Arxentina al calor de la llei de Memoria Democrática, conocida popularmente como la «Llei de nietos”, que reconoz como españoles a los descendientes de tercer xeneración de los nuesos emigrantes. Según una recién circular del Consuláu na capital arxentina hasta’l momentu recibiéronse yá 553.293 solicitúes de nacionalización y yá se tramitaron 184.293 espedientes.
Habida cunta l’estraordinariu pesu que tuvo la emigración asturiana a l’Arxentina, ye bien probable qu’una parte bien sustancial de los nuevos españoles acaben consolidaos nel censu como asturianos de nuevu cuñu, dada la so familia d’orixe.
Según el diariu arxentín “La Nación” una de les sorprendentes resultancies d’esti procesu de nacionalización de los descendientes de los nuesos emigrantes asitiaría a Bonos Aires “como la tercer ciudá del mundu con más españoles dempués de Madrid y Barcelona”.
Anguaño, yá hai 34.362 asturianos rexistraos nel censu d’españoles residente nel estranxeru. Ye’l país del estranxeru onde más asturianos hai dempués de México (25.077) y Cuba (16.822), según los últimos datos de la Sociedá Asturiana d’Estudios Económicos ya Industriales (SADEI). La Llei de nietos va disparar bien previsiblemente estes cifres. La población actual d’asturianos n’Arxentina ye similar a la del conceyu de Mieres, sestu conceyu más pobláu d’Asturies.
