Esperamos una xornada soleyera prácticamente dende primer hora de la mañana. Apenes s’esperen nubes y, poques gracies, la probabilidá de precipitaciones va ser nula. Los vientos van ser fluexos y variables anque na mariña podríen predominar de componente este. Les temperatures máximes van xubir hasta 5 ºC na metá sur asturiana y hasta 3 o 4 ºC na metá norte salvu na mariña onde l’ascensu va ser más llixeru. Con éses van llegase a algamar los 26 o 27 ºC con facilidá en cualquier puntu del interior, pudiendo rondar los 30 o 31 ºC nel suroccidente de la rexón. Na mariña, sicasí, van superar llixeramente los 20 ºC, siendo bien difícil que puedan algamar 23 o 24 ºC. Les temperatures mínimes van baxar na metá norte y van caltenese nel restu salvu en zones altes del cordal onde podríen rexistrase dellos ascensos.
El xueves va ser, xuntu al vienres, el día más templáu de la selmana. Vamos amanecer con nubes baxes na mariña y na metá norte del sector central, pero rápido van sumir dexando tol cielu asturianu estenu. Los vientos van predominar de sur nel cordal y otres zones del interior, ente que nel restu van ser variables. Les temperatures máximes van xubir entá más pudiendo rondar los 30 ºC na mayoría de poblaciones del interior, pudiendo algamar los 34 o 35 ºC nel suroccidente.
Calor tamién pal vienres pero, a lo llargo del sábadu, va entrar un frente fríu que va dexar un domingu serondiegu y un llunes con ciertos tintes ivernizos (posibilidá de que pueda nevar en cotes percima de los 1600 metros).
