El Principáu celebra la Selmana Europea del Deporte en 15 conceyos col focu puestu nel avieyamientu activu. Especialistes en salú, nutrición y deporte van analizar los beneficios de l’actividá física na vieyera nun foru en Valdés. Cultura entama sesiones gratuites d’iniciación al entrenamientu funcional que van percorrer el territoriu dende mañana y hasta el 27 de setiembre.
La Conseyería de Cultura, Política Llingüística y Deporte entamó un ampliu programa d’actividaes en 15 conceyos asturianos por cuenta de la Selmana Europea del Deporte, que se va celebrar dende mañana y hasta el 27 de setiembre. Los conceyos son: Valdés, Santo Adriano, Ribedeva, Cuideiru, Casu, Villaviciosa, Balmonte, Carreño, Cabrales, Tapia de Casariego, Salas, Piloña, Castropol, Yernes y Tameza, y Ribesella.
La programación empecipiará mañana na casa de cultura de Valdés, con un Foru sobro Avieyamientu Activu que va axuntar a especialistes en salú, nutrición y actividá física que van cavilgar sobro la importancia de la práctica deportiva y los vezos saludables pa llograr una vieyera más plena y autónoma.
Amás, el calendariu inclúi una actividá diaria d’iniciación al entrenamientu funcional, dirixida especialmente a persones mayores de 55 años. Esta iniciativa, que tien calter gratuitu y abiertu por aciu inscripción, ta entamada en collaboración col Colexu Oficial de Llicenciaos en Ciencies de l’Actividá Física y el Deporte d’Asturies (COLEF Asturies), y tien como oxetivu estender por tol territoriu’l vezu de la vida activa como ferramienta fundamental pa un avieyamientu saludable.
Toa esta programación enmárcase dientro del proyectu ADN Asturies, Deporte y Naturaleza, la iniciativa que sofita la designación del Principáu como Rexón Europea del Deporte 2025.
Meses redondes. La xornada articulase en dos meses redondes complementaries que van dexar encetar l’avieyamientu dende distintes perspectives:
- Mesa redonda 1. La importancia de llegar activos a la vieyera. Espaciu d’alderique sobro los beneficios de l’actividá física pa caltener la salú y l’autonomía personal. Van Participar Enrique Rodríguez Nuño, director xeneral de Promoción de l’Autonomía Personal y Mayores; Beatriz Ramos, terapeuta ocupacional especialista en xeriatría, y Diego García, psicólogu xeneral sanitariu y presidente de l’Asociación de Psicólogos Deportivos d’Asturies. Modera la periodista Ana María Serrano García.
- Mesa redonda 2: La importancia de la microbiota y los cuidos na alimentación pensando na vieyera. Una reflexón sobro la relación ente nutrición y avieyamientu saludable cola intervención de María Antonia Rodríguez, nutricionista y fundadora de Nutrición Rural; Miguel Gueimonde, investigador científicu del CSIC; y Javier Fernández, profesor de microbioloxía y espertu en microbiota de la Universidá d’Uviéu. La mesa va tar moderada pola periodista María Rendueles.
