- Alborecemos con escasa nubosidá, sicasí tan entrando delles nubes altes pel ocidente asturianu ya con muncho fríu, les temperatures como habíemos anunciáu perdebaxo de los 10ºC, tan alrodiu de los 7-8ºC, rexistrándose nel puirtu Payares 0,5ºC.
- Güei vamos teder dalgo de nubosidá alta que malpenes velará’l sol con unes temperatures mínimes en descensu, mentantu les másimes subirán dalgo, sobre too nel interior, na costa l’aire nordés pue ser cafiante y facer que baxe la sensación térmica.
- Mañana xueves volveremos alborecer con temperatures baxes ya inclusu con dalguna xelada nes zones más favoretibles pero dempués, la llume del sol, dirá caleciendo l’ambiente pa dexanos un día soleyeru y prestosu, sobre too nel interior, na costa de nuevu l’aire nordés pue soplar cafiante, baxando la sensación térmica.
- El vienres va tar poco nuboso o escampláu pela mañana con aumentu de la nubosidá pela tarde anque nun mos dexará’l día nuble con unes temperatures n’ascensu, perriba de los 20ºC nes hores centrales del día, amás l’aire nordés dirá amenorgando nel llitoral.
- El sábadu vamos tener más nubes pero tovía vamos ver dalgo’l sol con un ascensu moderáu de les temperatures mínimes, calteniéndose les másimes. Y el domingu la mañana sedrá más seliquina col cielu nuboso y paez que pue llegar la lluvia pela tarde, pero esto yá lu diremos viendo.
